ᱟᱨ ᱛᱤᱢᱤᱱ ᱫᱤᱱ ᱱᱚᱝᱠᱟ ᱞᱟᱝ ᱛᱟᱸᱦᱮᱱᱟ ᱦᱮᱸ ᱪᱚᱝ ᱚᱠᱚᱭ ᱞᱟᱹᱭ ᱠᱮ᱾ ᱪᱟᱹᱠᱨᱤ ᱟᱹᱣᱨᱤ ᱧᱟᱢ ᱦᱟᱹᱵᱤᱡ ᱪᱮᱫ ᱦᱚᱸ ᱵᱟᱝ ᱞᱟᱹᱭᱩᱜᱚᱜ ᱠᱟᱱᱟ᱾ ᱵᱟᱝ ᱦᱟᱹᱵᱤᱡ ᱫᱚ ᱤᱧ ᱜᱮ ᱠᱷᱚᱨᱪᱟᱹᱧ ᱮᱢ ᱦᱟᱛᱟᱲᱟ᱾
ᱚᱱᱟ ᱫᱚ ᱟᱨ ᱦᱩᱭᱩᱜᱼᱟ ᱛᱮ?
ᱫᱟᱹᱦᱱᱟᱹ ᱠᱚ ᱦᱮᱱᱟᱜ ᱛᱤᱧᱟ᱾ ᱤᱱᱟᱹ ᱠᱚᱛᱮ ᱞᱟᱝ ᱪᱟᱞᱟᱣ ᱦᱟᱱᱛᱟᱲᱟ᱾
ᱛᱤᱱ ᱫᱤᱱ ᱚᱱᱠᱟ ᱫᱚ᱾ ᱵᱟᱰᱟᱭ ᱜᱮᱭᱟᱢ ᱫᱩᱲᱩᱵ ᱫᱩᱲᱩᱵ ᱡᱚᱢ ᱞᱮᱠᱷᱟᱱ ᱥᱟᱱᱟᱢᱟᱜ ᱪᱟᱵᱟᱜᱼᱟ᱾
ᱢᱮᱱᱠᱷᱟᱱ, ᱠᱩᱢᱟᱹᱝ ᱟᱨ ᱫᱟᱫᱟ ᱛᱮᱠᱚ ᱚᱠᱟ ᱞᱮᱠᱟ ᱪᱚᱝ ᱛᱮᱵᱟᱜ ᱟᱠᱟᱫ ᱠᱚ ᱞᱮᱠᱟᱹᱧ ᱵᱩᱡᱮᱫᱟ᱾
ᱥᱟᱹᱨᱤ ᱥᱮ?
ᱦᱚᱭ, ᱵᱟᱹᱲᱛᱤ ᱠᱟᱭ ᱛᱮ ᱩᱱᱤ ᱞᱚᱢᱯᱚᱴ ᱞᱚᱜᱮᱱ᱾ ᱢᱤᱫ ᱫᱤᱱ ᱥᱚᱭᱫᱟ ᱠᱤᱨᱤᱧ ᱠᱷᱚᱱ ᱨᱩᱣᱟᱹᱲ ᱚᱠᱛᱮ ᱟᱡ ᱨᱤᱱ ᱜᱟᱛᱮ ᱴᱷᱮᱱᱴᱟ, ᱪᱚᱯᱮ ᱟᱨ ᱴᱷᱩᱢᱯᱩ ᱛᱮᱠᱚ ᱪᱮᱫ ᱠᱚᱪᱚ ᱤᱧ ᱧᱩᱛᱩᱢ ᱠᱚ ᱛᱷᱩᱛᱤ ᱠᱟᱱ ᱛᱟᱸᱦᱮᱫ᱾
ᱚᱱᱠᱟ ᱠᱟᱛᱷᱟ?
ᱚᱱᱟᱛᱮᱧ ᱢᱮᱱᱮᱫ ᱵᱟᱞᱟᱝ ᱵᱤᱞᱚᱢᱟ᱾ ᱵᱟᱝᱠᱷᱟᱱ ᱞᱟᱝ ᱧᱤᱨᱟ᱾
ᱚᱠᱟᱛᱮ?
ᱡᱟᱦᱟᱸ ᱥᱮᱫ ᱜᱮ᱾
ᱵᱟᱝᱼᱟ ᱚᱱᱠᱟ ᱫᱚ ᱵᱟᱝ᱾ ᱡᱟᱸᱦᱟᱱᱟᱜ ᱠᱟᱹᱢᱤ ᱛᱮᱜᱮ ᱦᱩᱭᱩᱜᱼᱟ ᱵᱟᱝ ᱝᱠᱷᱟᱱ ᱥᱩᱫᱽᱨᱤ ᱞᱟᱝ ᱠᱟᱹᱢᱤᱭᱟ᱾
ᱚᱱᱠᱟ ᱠᱟᱹᱢᱤ ᱫᱚ ᱵᱟᱝ ᱴᱷᱤᱠᱩᱜᱼᱟ᱾ ᱵᱟᱢ ᱫᱟᱲᱮᱜᱼᱟ᱾
ᱤᱧ ᱟᱢ ᱴᱷᱤᱠ ᱞᱟᱝ ᱛᱟᱸᱦᱮᱱ ᱠᱷᱟᱱ ᱪᱤᱞᱤ ᱦᱚᱸ ᱵᱟᱠᱚ ᱞᱮᱣᱮ ᱫᱟᱲᱮᱭᱟᱞᱟᱝᱼᱟ᱾
ᱥᱤᱸᱜᱟᱹᱲ ᱵᱮᱲᱟ᱾ ᱨᱮᱞ ᱞᱟᱹᱭᱮᱱ ᱫᱷᱟᱨᱮ ᱠᱷᱤᱡᱩᱨ ᱟᱨ ᱠᱟᱭᱨᱟ ᱫᱟᱨᱮ ᱞᱟᱴᱟ ᱨᱮ ᱠᱚᱲᱟ ᱟᱨ ᱠᱩᱲᱤ ᱢᱮᱱᱮᱠ ᱢᱟᱫᱷᱚᱵᱽ ᱟᱨ ᱢᱟᱫᱮᱢᱩᱱᱤ ᱛᱤᱠᱤᱱ ᱠᱤᱱ ᱢᱚᱯᱚᱥᱩᱞᱤ ᱡᱚᱝ ᱠᱟᱱᱟ᱾ ᱢᱚᱱᱮ ᱡᱤᱣᱤ ᱛᱚᱯᱚᱞ ᱟᱠᱟᱱ ᱛᱟᱹᱠᱤᱱ ᱠᱷᱚᱱ ᱱᱚᱶᱟ ᱟᱭᱛᱟᱱ ᱜᱮ ᱟᱹᱠᱤᱱᱟᱜ ᱟᱥᱨᱟ᱾ ᱛᱟᱠ ᱠᱤᱱ ᱧᱟᱢ ᱞᱮᱠᱷᱟᱱ ᱫᱩᱞᱟᱹᱲ ᱥᱤᱵᱤᱞ ᱠᱟᱛᱷᱟ ᱠᱤᱱ ᱛᱷᱩᱛᱤᱭᱟ᱾
ᱱᱟᱢᱟᱞ ᱫᱤᱥᱚᱢ ᱨᱮᱭᱟᱜ ᱢᱤᱫᱴᱟᱹᱝ ᱨᱟᱹᱥᱤ ᱟᱹᱛᱩ᱾ ᱪᱮᱛᱟᱱ ᱠᱩᱞᱦᱤ ᱨᱮ ᱫᱤᱠᱩ ᱥᱮ ᱪᱷᱟᱹᱛᱤᱠ ᱡᱟᱹᱛ ᱟᱨ ᱞᱟᱛᱟᱨ ᱠᱩᱞᱦᱤ ᱨᱮᱫᱚ ᱥᱟᱱᱛᱟᱲ ᱦᱮᱱᱟᱜ ᱟᱠᱟᱫ ᱠᱚᱣᱟ᱾ ᱥᱩᱯᱩᱞᱩᱠ ᱥᱟᱯᱟᱦᱚᱵ᱾ ᱢᱤᱫ ᱵᱟᱨ ᱜᱷᱮᱸᱜᱟ ᱦᱩᱭᱩᱜ ᱨᱮᱦᱚᱸ ᱟᱠᱚ ᱛᱮᱜᱮ ᱠᱚ ᱥᱤᱜᱤᱞᱟ᱾ ᱢᱮᱱᱠᱷᱟᱱ ᱡᱟᱹᱛ ᱫᱷᱚᱨᱚᱢ ᱛᱟᱲᱟᱢ ᱯᱟᱨᱚᱢ ᱨᱮᱫᱚ ᱛᱟᱯᱟᱢ ᱜᱚᱯᱚᱡ᱾
ᱮᱱᱛᱮ ᱨᱮᱦᱚᱸ ᱥᱤᱵᱤᱞ ᱫᱩᱯᱩᱞᱟᱹᱲ ᱮᱯᱮᱢ ᱪᱟᱯᱟᱞ ᱵᱟᱝ ᱠᱚᱢ ᱟᱠᱟᱱᱟ᱾ ᱛᱟᱠ ᱧᱟᱢ ᱟᱠᱟᱫ ᱥᱮ ᱞᱟᱴᱟ ᱠᱚᱨᱮ, ᱦᱟᱴ ᱯᱟᱛᱟ ᱠᱚᱨᱮ ᱠᱚᱲᱟ ᱠᱩᱲᱤ ᱚ ᱨᱚᱢᱚᱡᱽ ᱡᱚᱝ ᱠᱟᱱᱟ᱾
ᱫᱤᱠᱩ ᱴᱚᱞᱟ ᱨᱮ ᱢᱟᱫᱷᱚᱵᱽ ᱛᱮᱠᱚ ᱫᱚᱠ ᱠᱟᱱᱟ ᱢᱟᱦᱟᱡᱚᱱ, ᱟᱯᱟᱛ ᱛᱮᱫᱟᱜ ᱠᱟᱹᱢᱤ ᱯᱟᱴᱟ ᱜᱮ ᱫᱟᱫᱟᱛ ᱛᱮᱫ ᱮᱭ ᱥᱟᱵ ᱟᱠᱟᱫᱟ᱾ ᱠᱳᱞᱮᱡᱽ ᱯᱟᱲᱦᱟᱣ ᱵᱟᱹᱜᱤ ᱠᱟᱛᱮ ᱢᱟᱫᱷᱚᱵᱽ ᱫᱚ ᱫᱟᱫᱟ ᱥᱟᱶ ᱠᱟᱹᱢᱤ ᱨᱮᱭ ᱟᱹᱪᱩᱣᱟᱠᱟᱱᱟ᱾
ᱢᱟᱫᱮ ᱢᱟᱹᱭ ᱫᱚ ᱟᱯᱟᱛ ᱴᱩᱣᱟᱹᱨ᱾ ᱠᱟᱠᱟᱛ ᱛᱮᱠᱚ ᱥᱟᱶ ᱵᱟᱭ ᱯᱚᱴᱟᱣ ᱞᱮᱱ ᱛᱮ ᱢᱟᱢᱚ ᱛᱮᱠᱚ ᱚᱲᱟᱜ ᱨᱮ ᱦᱮᱱᱟᱜ ᱠᱤᱱᱟ᱾ ᱢᱟᱢᱚ ᱠᱤᱥᱩᱱ ᱴᱩᱰᱩ ᱟᱺᱰᱭᱟᱹ ᱠᱤᱥᱟᱹᱬ᱾ ᱱᱩᱠᱤᱱᱟᱜ ᱦᱟᱢᱟᱞ ᱠᱟᱹᱢᱤ ᱦᱚᱸ ᱵᱟᱭ ᱵᱩᱡᱽ ᱞᱮᱫᱟ᱾ ᱢᱟᱢᱚ ᱨᱮᱱ ᱦᱚᱯᱚᱱ ᱮᱨᱟ ᱠᱚ ᱥᱟᱶ ᱢᱟᱫᱮ ᱢᱟᱹᱭ ᱦᱚᱸ ᱯᱟᱲᱦᱟᱜ ᱠᱟᱱᱟ᱾
ᱯᱩᱭᱞᱩ ᱡᱟᱦᱟᱸ ᱦᱤᱞᱚᱜᱤᱱ ᱧᱟᱯᱟᱢᱮᱱᱟ ᱤᱱᱟᱹ ᱦᱤᱞᱚᱜ ᱫᱚ ᱛᱷᱩᱛᱤ ᱛᱟᱢᱟᱥᱟ ᱜᱮ ᱜᱟᱛᱮ ᱜᱟᱯᱟᱛᱮ ᱞᱮᱠᱟ᱾ ᱛᱟᱭᱚᱢ ᱫᱚᱠᱤᱱ ᱜᱟᱰᱷᱟᱣ ᱤᱫᱤ ᱠᱮᱫᱟ᱾
ᱡᱟᱦᱟᱸ ᱛᱤᱱᱟᱹᱜ ᱩᱠᱩ ᱫᱟᱱᱟᱝ ᱠᱟᱹᱢᱤ ᱞᱮ ᱨᱮᱦᱚᱸ ᱢᱤᱫ ᱫᱤᱱ ᱵᱟᱝ ᱢᱤᱫ ᱫᱤᱱ ᱥᱚᱫᱚᱨ ᱥᱟᱢᱟᱝᱚᱜ ᱜᱮᱭᱟ᱾
ᱥᱟᱱᱛᱟᱲ ᱠᱚᱲᱟ ᱞᱟᱹᱠᱷᱟᱭ ᱟᱹᱰᱤ ᱞᱮᱠᱟᱱ ᱞᱚᱪᱷᱱᱟ ᱛᱮ ᱢᱟᱫᱮ ᱥᱟᱶ ᱢᱮᱥᱟᱜ ᱮ ᱪᱷᱩᱴᱟᱹᱣ ᱟᱠᱟᱱᱟ᱾ ᱢᱮᱱ ᱫᱚ ᱢᱟᱫᱮ ᱴᱮᱨᱟ ᱛᱮᱦᱚᱸ ᱵᱟᱭ ᱠᱚᱭᱚᱜ ᱞᱮᱜᱟᱭᱟ᱾ ᱱᱚᱶᱟ ᱨᱟᱹᱜᱤ ᱨᱤᱥ ᱛᱮ ᱞᱟᱹᱠᱷᱟᱹᱭ ᱱᱩᱭ ᱠᱩᱲᱤ ᱯᱤᱪᱷᱟᱹ ᱨᱮᱭ ᱞᱟᱜᱟᱣ ᱟᱠᱟᱱᱟ᱾ ᱟᱹᱠᱷᱤᱨ ᱨᱮ ᱢᱟᱫᱮ ᱟᱨ ᱢᱟᱫᱷᱚᱵᱽ ᱵᱟᱝ ᱠᱤᱱ ᱯᱟᱨᱚᱢ ᱫᱟᱲᱮᱭᱟᱜ ᱱᱟ᱾ ᱠᱟᱛᱷᱟ ᱠᱟᱛᱷᱟ ᱛᱮ ᱴᱚᱞᱟ ᱯᱟᱲᱟ ᱦᱚᱲ ᱠᱚ ᱵᱟᱰᱟᱭ ᱧᱟᱢᱟ ᱠᱮᱫᱟ᱾ ᱢᱟᱢᱚᱛ ᱴᱷᱮᱱ ᱦᱚᱸ ᱠᱟᱛᱷᱟ ᱫᱚ ᱥᱮᱴᱮᱨᱮᱱᱟ᱾
ᱡᱟᱣ ᱫᱤᱱ ᱞᱮᱠᱟ ᱤᱱᱟᱹ ᱦᱤᱞᱚᱜ ᱦᱚᱸ ᱚᱱᱟ ᱞᱟᱴᱟ ᱨᱮᱠᱤᱱ ᱧᱟᱢ ᱟᱠᱟᱱᱟ᱾ ᱛᱷᱩᱛᱤ ᱨᱮ ᱞᱟᱵᱟᱫᱷᱤᱭᱟᱹᱣ᱾ ᱱᱚᱶᱟ ᱛᱟᱠ ᱨᱮ ᱞᱟᱹᱠᱷᱟᱹᱭ ᱵᱟᱨ ᱯᱮ ᱦᱚᱲ ᱥᱟᱶᱛᱮᱭ ᱮᱥᱮᱫ ᱠᱮᱫ ᱠᱤᱱᱟ᱾
ᱛᱮᱦᱮᱧ ᱫᱚ ᱯᱟᱪᱟᱱ ᱡᱷᱟᱹᱞᱤ ᱨᱮ ᱥᱮᱸᱫᱽᱨᱟ ᱵᱚᱱ ᱯᱟᱲᱟᱣ ᱟᱠᱟᱫ ᱠᱤᱱᱟ, ᱞᱟᱹᱠᱷᱟᱹᱭ ᱮ ᱢᱮᱱ ᱠᱮᱫᱟ᱾
ᱮᱸᱜᱟᱛᱮ ᱵᱚᱱ ᱯᱤᱴᱟᱹᱣ ᱢᱟᱨᱥᱟᱞ ᱠᱤᱱᱟ ᱠᱚᱲᱟ ᱠᱚᱠᱚ ᱞᱟᱹᱭ ᱠᱮᱫᱟ᱾
ᱵᱟᱝᱼᱟ ᱠᱚᱲᱟ ᱥᱩᱢᱩᱝ ᱜᱮᱵᱚ ᱥᱟᱥᱮᱛᱮᱭᱟ ᱞᱟᱹᱠᱷᱟᱹᱭ ᱮ ᱢᱮᱱ ᱠᱮᱫᱟ᱾ ᱢᱟᱫᱮ, ᱫᱩ ᱟᱢ ᱫᱚ ᱚᱲᱟᱜ ᱥᱮᱱᱚᱜ ᱢᱮ᱾ ᱴᱷᱟᱥ ᱢᱮᱱᱛᱮ ᱢᱟᱫᱷᱚᱵᱽ ᱪᱮᱴᱟᱜ ᱠᱟᱛᱮ ᱢᱮᱛᱟ ᱫᱮᱭᱟᱭ ᱼ ᱟᱯᱮ ᱨᱮᱱ ᱠᱩᱲᱤ ᱫᱚ ᱚᱠᱚᱭ ᱭᱟᱭ ᱟᱺᱰᱤᱡᱮᱫ ᱠᱚᱣᱟ? ᱫᱷᱩᱨᱟᱹᱦᱟ ᱠᱟᱺᱦᱤ ᱠᱟᱨ᱾
ᱵᱚᱭᱦᱟ ᱤᱧᱟᱜ ᱫᱚᱥ ᱫᱚ ᱵᱟᱝ ᱠᱟᱱᱟ, ᱟᱡ ᱜᱮ᱾ ᱢᱟᱫᱷᱚᱵᱽ ᱮ ᱢᱮᱱ ᱠᱮᱫᱟ᱾
ᱱᱤᱡᱮᱨᱟᱜ ᱯᱷᱚᱨᱯᱷᱩᱱᱫᱤ ᱠᱩᱲᱤᱭ ᱫᱚᱥᱮ ᱠᱟᱱᱟ᱾ ᱠᱚᱲᱟ ᱠᱚᱠᱚ ᱞᱟᱹᱭ ᱠᱮᱫᱟ᱾
ᱤᱱᱟᱹ ᱦᱤᱞᱚᱜ ᱫᱚ ᱟᱹᱠᱩᱞᱚᱜ ᱞᱮᱠᱟ ᱫᱟᱞ ᱵᱟᱲᱟ ᱠᱟᱛᱮ ᱠᱚ ᱟᱲᱟᱜ ᱠᱟᱫᱮᱭᱟ᱾ ᱚᱲᱟᱜ ᱦᱮᱡ ᱢᱟᱫᱮ ᱢᱟᱹᱭ ᱫᱚ ᱨᱚᱦᱮᱫ ᱮᱜᱮᱨ ᱵᱟᱲᱟ ᱠᱟᱛᱮ ᱵᱟᱝ ᱵᱟᱦᱮᱨᱚᱜ ᱠᱚ ᱢᱮᱛᱟᱫᱮᱭᱟ᱾
ᱚᱱᱛᱮ ᱫᱟᱞ ᱡᱚᱢ ᱢᱟᱫᱷᱚᱵᱽ ᱟᱹᱰᱤ ᱟᱸᱴ ᱚᱯᱚᱢᱟᱱ ᱮ ᱵᱩᱡᱷᱟᱹᱣ ᱠᱮᱫᱟ᱾ ᱨᱤᱠᱤᱲᱟᱱᱟᱭ ᱢᱟᱫᱮ ᱢᱟᱹᱭ ᱫᱚ ᱟᱹᱜᱩᱭᱮ ᱛᱮᱜᱮ ᱦᱩᱭᱩᱜᱼᱟ᱾ ᱢᱚᱱᱮ ᱡᱤᱣᱤ ᱛᱟᱹᱠᱤᱱ ᱱᱩᱱᱟᱹᱜ ᱩᱨᱤᱡ ᱟᱠᱟᱱᱟ ᱡᱮ ᱩᱱᱤ ᱵᱟᱝ ᱠᱷᱟᱱ ᱱᱩᱭ ᱵᱟᱝ, ᱱᱩᱭ ᱵᱟᱝ ᱠᱷᱟᱱ ᱩᱱᱤ ᱵᱟᱝ ᱠᱤᱱ ᱛᱟᱦᱮᱸ ᱫᱟᱲᱮᱭᱟᱜᱼᱟ᱾
ᱵᱟᱝ ᱫᱚ ᱪᱟᱸᱫᱳ ᱫᱤᱭᱟᱹ ᱵᱟᱝ ᱫᱚ ᱧᱟᱯᱟᱢᱚᱜ ᱜᱮ ᱞᱤᱠᱷᱚᱱ ᱦᱮᱱᱟᱜ ᱛᱟᱹᱠᱤᱱ᱾ ᱢᱤᱫ ᱫᱤᱱ ᱧᱟᱯᱟᱢ ᱛᱟᱠ ᱥᱟᱹᱨᱤ ᱛᱮᱦᱚᱸ ᱯᱷᱟᱵᱟᱣᱟᱫ ᱠᱤᱱᱟ᱾ ᱤᱱᱟᱹ ᱦᱤᱞᱚᱜ ᱫᱚ ᱢᱟᱫᱮ ᱢᱟᱢᱚ ᱛᱮᱠᱚ ᱚᱲᱟᱜ ᱨᱮ ᱪᱮᱫ ᱪᱚᱝ ᱠᱚ ᱵᱚᱸᱜᱟ ᱵᱳᱨᱳᱜ ᱠᱟᱱ ᱛᱟᱦᱮᱸ ᱠᱟᱱᱟ᱾ ᱦᱚᱲ ᱠᱚ ᱡᱚᱦᱚᱲ ᱦᱮᱱᱚᱜ ᱠᱚ ᱛᱟᱠ ᱨᱮ ᱢᱟᱫᱮ ᱢᱟᱹᱭ ᱦᱩᱯᱩᱡ ᱢᱮᱱᱛᱮ ᱵᱟᱲᱜᱮ ᱥᱮᱱ ᱚᱰᱚᱠ ᱥᱚᱡᱷᱮ ᱚᱱᱟ ᱠᱟᱭᱨᱟ ᱞᱟᱴᱟᱭ ᱵᱚᱞᱚᱭᱮᱱᱟ᱾ ᱧᱮᱞᱮᱭᱟᱭ ᱱᱤᱡᱷᱩᱢ ᱮ ᱫᱩᱲᱩᱵ ᱟᱠᱟᱱᱟ ᱢᱟᱫᱷᱚᱵᱽ᱾ ᱫᱩᱲᱩᱵ ᱯᱟᱱᱛᱮᱭ ᱢᱮᱛᱟ ᱫᱮᱭᱟ ᱼ ᱫᱮᱞᱟᱝ ᱛᱮᱦᱮᱧ ᱫᱚ ᱡᱟᱦᱟᱸ ᱥᱮᱫ ᱜᱮᱞᱟᱝ ᱧᱤᱨᱟ ᱱᱤᱛ ᱜᱮ᱾
ᱚᱠᱟ ᱞᱟᱝ ᱥᱮᱱᱚᱜᱼᱟ?
ᱢᱟᱫᱷᱚᱵᱽ ᱮ ᱢᱮᱱ ᱠᱮᱫᱟ, ᱫᱮᱞᱟᱝ ᱚᱲᱟᱜ ᱜᱮᱧ ᱤᱫᱤ ᱢᱮᱭᱟ ᱟᱞᱟᱝ ᱟᱜ ᱠᱟᱛᱷᱟ ᱫᱟᱫᱟᱧ ᱞᱟᱹᱭ ᱟᱠᱟᱣᱟᱫᱮᱭᱟ᱾ ᱩᱱᱤ ᱫᱚ ᱟᱢ ᱤᱫᱤ ᱜᱮᱭ ᱨᱮᱵᱮᱱ ᱟᱠᱟᱱᱟ᱾
ᱥᱟᱹᱨᱤ? ᱮᱱᱠᱷᱟᱱ ᱢᱟ ᱟᱹᱰᱤ ᱱᱟᱯᱟᱭ᱾
ᱤᱧ ᱢᱟ ᱞᱟᱦᱟ ᱨᱮᱜᱮᱧ ᱢᱮᱛᱟ ᱟᱠᱟᱣᱟᱫ ᱢᱮ ᱚᱲᱟᱜ ᱜᱮᱧ ᱤᱫᱤ ᱢᱮᱭᱟ᱾ ᱧᱮᱞ ᱠᱚᱣᱟᱹᱧ ᱱᱩᱠᱩ ᱥᱟᱱᱛᱟᱲ᱾
ᱫᱮᱞᱟᱝ ᱮᱱᱠᱷᱟᱱ ᱵᱟᱞᱟᱝ ᱵᱤᱞᱚᱢᱟ᱾ ᱢᱟᱫᱮ ᱢᱮᱱ ᱠᱮᱫᱟᱭ᱾
ᱦᱚᱭ ᱫᱮᱞᱟᱝ᱾ ᱟᱹᱰᱤ ᱥᱟᱸᱦᱚᱥ ᱢᱟᱫᱷᱚᱵᱽ ᱮ ᱞᱟᱹᱭ ᱠᱮᱫᱟ᱾
ᱛᱤ ᱥᱟᱯᱟᱵ ᱢᱟᱫᱷᱚᱵᱽ ᱢᱟᱫᱮ ᱚᱲᱟᱜ ᱠᱤᱱ ᱵᱚᱞᱚᱭᱮᱱᱟ᱾ ᱦᱤᱞᱤ ᱫᱟᱫᱟ ᱪᱮᱫ ᱦᱚᱸ ᱵᱟᱝ ᱠᱤᱱ ᱢᱮᱱ ᱞᱮᱫᱟ᱾ ᱵᱚᱨᱪᱚᱝ ᱱᱟᱯᱟᱭ ᱛᱮᱠᱤᱱ ᱟᱛᱟᱝ ᱫᱟᱨᱟᱢ ᱠᱮᱫ ᱠᱤᱱᱟ᱾ ᱫᱟᱫᱟᱼᱣᱟᱜ ᱠᱟᱛᱷᱟ ᱼ ᱟᱹᱠᱤᱱ ᱜᱮᱥᱮ ᱠᱤᱱ ᱵᱩᱡᱷᱟᱹᱣᱟ᱾ ᱵᱩᱜᱤ ᱵᱟᱹᱲᱤᱡ ᱟᱹᱠᱤᱱ ᱜᱮᱠᱤᱱ ᱥᱟᱸᱵᱽᱲᱟᱣᱟ᱾
ᱵᱟᱹᱨᱥᱤᱧ ᱯᱮ ᱢᱟᱦᱟᱸ ᱯᱟᱨᱚᱢᱮᱱᱟ᱾ ᱚᱠᱚᱭ ᱦᱚᱸ ᱪᱮᱫ ᱡᱟᱸᱦᱟᱱᱟᱜ ᱵᱟᱠᱚ ᱧᱩᱢ ᱵᱟᱲᱟ ᱞᱮᱫᱟ᱾ ᱢᱟᱫᱮ ᱢᱩᱱᱤ ᱟᱨ ᱢᱟᱫᱷᱚᱵᱽ ᱨᱟᱹᱥᱠᱟᱹ ᱫᱚᱨᱭᱟ ᱨᱮᱠᱤᱱ ᱩᱱᱩᱢᱮᱱᱟ᱾
ᱢᱮᱱᱠᱷᱟᱱ ᱱᱚᱶᱟ ᱨᱟᱹᱥᱠᱟᱹ ᱡᱟᱹᱥᱛᱤ ᱫᱤᱱ ᱵᱟᱝ ᱛᱟᱦᱮᱸ ᱞᱮᱱᱟ᱾ ᱟᱪᱠᱟ ᱜᱮ ᱢᱤᱫ ᱫᱤᱱ ᱟᱹᱛᱩ ᱢᱚᱬᱮ ᱦᱚᱲ ᱥᱚᱸᱜᱮ ᱠᱟᱛᱮ ᱢᱟᱢᱛ ᱛᱫ ᱢᱟᱫᱷᱚᱵᱽ ᱛᱮᱠᱚ ᱚᱲᱟᱜ ᱛᱮᱭ ᱦᱮᱡ ᱮᱱᱟ᱾ ᱟᱹᱛᱩ ᱨᱮᱱ ᱵᱟᱨ ᱯᱮ ᱦᱚᱲ ᱥᱟᱶ ᱞᱟᱹᱠᱷᱟᱹᱭ ᱦᱮᱱᱟᱭᱟ᱾ ᱫᱟᱹᱵᱤ ᱛᱟᱠᱚ ᱜᱚᱱᱚᱝ ᱮᱢᱚᱜ ᱦᱩᱭᱩᱜᱼᱟ᱾
ᱜᱩᱞᱢᱟᱞ ᱟᱸᱡᱚᱢ ᱢᱟᱫᱮ ᱢᱟᱹᱭ ᱚᱲᱟᱜ ᱵᱷᱤᱛᱨᱤ ᱠᱷᱚᱱ ᱚᱰᱚᱠ ᱢᱟᱫᱷᱚᱵᱽ ᱯᱟᱱᱛᱮ ᱨᱮ ᱛᱤᱸᱜᱩ ᱠᱟᱛᱮᱭ ᱢᱮᱱ ᱠᱮᱫᱟ ᱼ ᱢᱟᱢᱚ ᱜᱚᱱᱚᱝ ᱴᱟᱠᱟ ᱫᱚ ᱵᱟᱝ ᱞᱤᱧ ᱮᱢᱚᱜᱼᱟ᱾ ᱟᱨ ᱟᱸᱡᱚᱢ ᱵᱤᱱ ᱟᱹᱵᱤᱱ ᱚᱲᱟᱜ ᱠᱷᱚᱱ ᱫᱚ ᱞᱤᱧ ᱚᱰᱚᱠ ᱦᱮᱡ ᱟᱠᱟᱱᱟ᱾
ᱛᱷᱤᱨᱩᱜ ᱢᱮ ᱟᱢ ᱫᱚ ᱪᱮᱫ ᱦᱚᱸ ᱵᱟᱝ ᱞᱮ ᱢᱮᱛᱟᱣᱟᱢ ᱠᱟᱱᱟ᱾ ᱪᱮᱞᱮ ᱭᱟ ᱢᱟᱫᱷᱚᱵᱽ, ᱮᱢᱚᱜ ᱟᱢ ᱥᱮ ᱵᱟᱝ?
ᱵᱟᱹᱧ ᱮᱢᱚᱜᱼᱟ᱾ ᱜᱚᱡ ᱜᱚᱫᱚᱜ ᱨᱮᱦᱚᱧ, ᱦᱮᱡ ᱟᱠᱟᱱ ᱦᱚᱲ ᱱᱚᱶᱟ ᱠᱟᱛᱷᱟ ᱟᱸᱡᱚᱢ ᱜᱮᱠᱚ ᱛᱟᱺᱜᱤ ᱟᱠᱟᱫᱟ᱾ ᱨᱚᱲ ᱥᱟᱶ ᱜᱮ ᱥᱚᱫᱚᱨ ᱥᱟᱢᱟᱝ ᱠᱚ ᱢᱟᱜ ᱜᱚᱡ ᱠᱮᱫ ᱠᱤᱱᱟ᱾ ᱦᱤᱛᱞᱟᱹᱭ ᱟᱛᱮ ᱜᱟᱹᱨᱩᱢ ᱜᱮᱠᱚ ᱨᱩᱣᱟᱹᱲ ᱮᱱᱟ᱾
ᱡᱟᱹᱛ ᱫᱷᱚᱨᱚᱢ ᱨᱮᱭᱟᱜ ᱚᱯᱚᱢᱟᱱ ᱠᱚ ᱦᱟᱞᱟ ᱠᱮᱫᱟ᱾ ᱚᱠᱚᱭ ᱦᱚᱸ ᱵᱟᱠᱚ ᱵᱩᱡᱽ ᱛᱮᱵᱟᱜ ᱞᱮᱫᱟ ᱱᱩᱠᱤᱱᱟᱜ ᱡᱤᱣᱤ ᱜᱟᱹᱦᱤᱨ ᱥᱤᱵᱤᱞ᱾
ᱫᱚᱥᱟᱨ ᱦᱤᱞᱚᱜ ᱛᱷᱟᱱᱟ ᱠᱷᱚᱱ ᱫᱟᱨᱚᱜᱟ ᱟᱹᱰᱤ ᱥᱟᱸᱜᱮ ᱥᱤᱯᱟᱹᱦᱤ ᱥᱟᱶᱛᱮ ᱦᱮᱡ ᱠᱟᱛᱮ ᱱᱩᱠᱩ ᱠᱟᱹᱭ ᱟᱠᱟᱫ ᱠᱚ ᱛᱚᱞ ᱠᱟᱛᱮ ᱠᱚ ᱤᱫᱤ ᱠᱮᱫ ᱠᱚᱣᱟ᱾
Comments
Post a Comment