ᱜᱷᱟᱹᱨᱫᱤ ᱡᱟᱶᱟᱭ (Santhali Story)

ᱡᱷᱮᱸᱴ ᱵᱚᱸᱜᱟ ᱨᱮᱭᱟᱜ ᱥᱟᱹᱨᱫᱤ ᱥᱤᱛᱩᱝ᱾ ᱥᱤᱧ ᱪᱟᱸᱫᱳ ᱟᱡᱟᱜ ᱥᱮᱸᱜᱮᱞ ᱛᱟᱨᱟᱥ ᱫᱷᱟᱹᱨᱛᱤ ᱛᱟᱞᱟ ᱨᱮᱭ ᱛᱟᱨᱥᱮ ᱟᱠᱟᱜᱼᱟ᱾ ᱦᱚᱭᱼᱦᱤᱥᱤᱫ ᱦᱚᱸ ᱦᱟᱭᱟᱢᱼᱦᱟᱭᱟᱢ ᱜᱮ ᱟᱹᱭᱠᱟᱹᱣᱚᱜ ᱠᱟᱱᱟ᱾ ᱚᱱᱟ ᱛᱮᱜᱮ ᱯᱟᱞᱮᱱ ᱫᱟᱨᱮ ᱱᱟᱹᱲᱤ ᱠᱚᱦᱚᱸ ᱠᱟᱺᱦᱤᱥ ᱡᱟᱞᱟ ᱛᱮ ᱞᱤᱭᱚᱨᱼᱠᱚᱫᱚᱨ ᱦᱚᱸ ᱦᱟᱹᱯᱤᱫ ᱟᱠᱟᱱᱟ᱾ ᱛᱤᱠᱤᱱ ᱵᱮᱲᱟ ᱡᱚᱛᱚ ᱠᱚ ᱮᱨᱚᱜ ᱵᱟᱹᱫᱽ ᱠᱷᱚᱱ ᱥᱤᱭᱩᱜ ᱨᱟᱲᱟ ᱨᱟᱲᱟ ᱠᱟᱛᱮ ᱵᱟᱹᱫᱽ ᱥᱩᱨ ᱠᱚᱨᱮᱱᱟᱜ ᱫᱟᱨᱮ ᱵᱩᱴᱟᱹ ᱠᱚᱨᱮ ᱠᱚ ᱩᱢᱩᱞ ᱡᱤᱨᱟᱹᱣ ᱟᱠᱟᱱᱟ᱾ ᱪᱟᱨᱮᱡ ᱥᱟᱠᱲᱟ ᱨᱮᱭᱟᱜ ᱵᱟᱹᱨᱩ ᱵᱟᱹᱭᱦᱟᱹᱲ ᱨᱮ ᱠᱟᱨᱟᱱ ᱫᱚ ᱮᱠᱞᱟ ᱜᱮᱭ ᱥᱤᱭᱩᱜ ᱠᱟᱱᱟ᱾ ᱵᱟᱨ ᱟᱛᱨᱮ ᱢᱮᱱᱟᱜ ᱜᱮᱛᱮ ᱥᱤᱭᱩᱜ ᱨᱟᱲᱟ ᱨᱮᱭ ᱵᱤᱞᱚᱢ ᱜᱚᱫ ᱟᱠᱟᱱᱟ᱾ ᱫᱟᱜ ᱛᱮᱛᱟᱝ, ᱫᱟᱠᱟ ᱨᱮᱸᱜᱮᱡ ᱥᱮᱨᱢᱟ ᱥᱤᱛᱩᱝ ᱫᱮᱭᱟ ᱠᱟᱛᱮ ᱛᱮᱦᱮᱧ ᱨᱮᱜᱮ ᱚᱱᱟ ᱢᱟᱨᱟᱝ ᱵᱟᱹᱨᱩᱼᱵᱟᱹᱭᱦᱟᱹᱲ ᱨᱮ ᱦᱩᱲᱩᱭ ᱮᱨ ᱯᱩᱨᱟᱹᱣ ᱠᱟᱜᱼᱟ ᱢᱮᱱᱛᱮᱭ ᱢᱚᱱᱼᱥᱩᱵᱟᱹ ᱟᱠᱟᱜᱼᱟ᱾ ᱵᱟᱹᱫ ᱨᱤᱱ ᱯᱩᱨᱟᱹᱣ ᱵᱟᱲᱟ ᱛᱮᱜᱮ ᱵᱚᱦᱚᱜ ᱪᱮᱛᱟᱱ ᱥᱤᱧ ᱪᱟᱸᱫᱚ ᱦᱚᱸ ᱱᱟᱥᱮᱭ ᱞᱟᱲᱟᱣ ᱧᱚᱜ ᱮᱱ ᱜᱮᱭᱟ᱾

ᱥᱤᱭᱩᱜ ᱨᱟᱲᱟ ᱠᱟᱛᱮ ᱠᱟᱨᱟᱱ ᱫᱚ ᱰᱟᱸᱜᱽᱨᱟ ᱠᱤᱱ ᱠᱟᱫᱟᱢ ᱡᱷᱟᱨᱱᱟ ᱥᱮᱱ ᱮ ᱞᱟᱜᱟ ᱜᱚᱫ ᱠᱟᱫ ᱠᱤᱱᱟ᱾ ᱟᱨ ᱟᱡ ᱫᱚ ᱱᱟᱦᱮᱞ ᱟᱨᱟᱬ ᱜᱚᱜ ᱠᱟᱛᱮ ᱚᱲᱟᱜ ᱢᱚᱦᱰᱟᱭ ᱛᱟᱲᱟᱢ ᱠᱮᱜᱼᱟ᱾ ᱠᱩᱞᱦᱤ ᱯᱤᱸᱰᱟᱹ ᱨᱮ ᱱᱟᱦᱮᱞ ᱟᱨᱟᱬ ᱴᱮᱸᱰᱟᱨ ᱠᱟᱛᱮ ᱵᱚᱦᱚᱜ ᱨᱮᱭᱟᱜ ᱜᱟᱢᱪᱷᱟ ᱫᱟᱹᱦᱲᱤ ᱨᱟᱲᱟ ᱠᱟᱛᱮ ᱤᱣᱤᱨᱼᱤᱣᱤᱨ ᱠᱩᱞᱦᱤ ᱯᱤᱸᱰᱟᱹ ᱨᱮᱭ ᱫᱩᱲᱩᱵ ᱜᱚᱫ ᱞᱮᱱ ᱨᱮ, ᱠᱩᱞᱦᱤ ᱢᱮᱞᱟ ᱠᱷᱚᱱ ᱟᱡ ᱵᱟᱹᱦᱩᱣᱟᱜ ᱢᱤᱫ ᱪᱟᱪᱟᱨᱦᱟᱫ ᱟᱲᱟᱝ ᱟᱡᱟᱜ ᱞᱩᱛᱩᱨ ᱠᱤᱱ ᱨᱮ ᱛᱟᱨᱠᱚ ᱠᱟᱛᱮ ᱨᱤᱫᱟᱹᱭ ᱵᱷᱤᱛᱤᱨ ᱦᱚᱸᱭ ᱫᱟᱠᱟᱞᱼᱫᱟᱠᱟᱞ ᱜᱚᱫ ᱠᱟᱫ ᱛᱟᱭᱟ᱾ ᱠᱩᱞᱦᱤ ᱢᱮᱞᱟ ᱠᱷᱚᱱ ᱜᱮ ᱟᱹᱡᱤᱡ ᱮᱨᱟ ᱠᱟᱹᱨᱢᱤ ᱫᱚ ᱵᱤᱵᱽᱞᱤ ᱩᱲᱤᱡ ᱞᱮᱠᱟ ᱯᱷᱟᱫᱽᱼᱯᱷᱟᱫᱟᱣ ᱠᱟᱛᱮ ᱜᱮᱸᱫᱽᱨᱟᱣ ᱟᱲᱟᱝ ᱛᱮᱭ ᱢᱮᱱ ᱞᱟᱜᱼᱟ,”ᱞᱟᱸᱜᱟ ᱡᱚᱢ ᱟᱹᱜᱩ ᱠᱮᱫ ᱢᱮᱭᱟ ᱟᱲᱟᱜ ᱨᱮ ᱢᱤᱫ ᱴᱷᱚᱯ ᱦᱚᱸ ᱫᱟᱜ ᱵᱟᱹᱱᱩᱜᱼᱟ ᱦᱮᱡ ᱛᱚᱨᱟᱢ ᱮᱫᱮᱭᱮᱱ ᱫᱚ, ᱫᱟᱜ ᱢᱟᱲᱟᱝ ᱞᱩ ᱟᱹᱜᱩ ᱞᱮᱢ᱾” ᱟᱸᱡᱚᱢ ᱠᱮᱜ ᱟᱢ ᱥᱮ ᱵᱟᱝᱼᱟ? ᱞᱩᱛᱩᱨ ᱵᱟᱝᱠᱷᱟᱱ ᱤᱧ ᱦᱚᱴᱚᱨ ᱯᱷᱟᱹᱨᱪᱟ ᱠᱟᱜ ᱛᱟᱢᱟ᱾

ᱡᱤᱣᱤ ᱠᱷᱟᱺᱫᱽᱨᱤ ᱦᱩᱨᱩᱢ ᱰᱤᱜᱤᱨ ᱥᱮᱸᱜᱮᱞ ᱛᱮ ᱢᱟᱲᱟᱜᱼᱢᱟᱲᱟᱜ ᱞᱚ ᱞᱮᱠᱟᱱ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱠᱟᱨᱟᱱ ᱫᱚ ᱪᱮᱫ ᱦᱚᱸ ᱵᱟᱝᱼᱮ ᱢᱮᱱ ᱨᱩᱣᱟᱹᱲ ᱞᱟᱜᱼᱟ᱾ ᱥᱮᱨᱢᱟ ᱥᱟᱺᱜᱤᱧ ᱥᱮᱱ ᱠᱚᱭᱚᱜ ᱠᱟᱛᱮ ᱠᱷᱟᱹᱞᱤ ᱦᱚᱭ ᱱᱤᱥᱟᱹᱥ ᱜᱮᱭ ᱟᱲᱟᱜ ᱞᱟᱜᱼᱟ᱾ ᱵᱟᱹᱭᱼᱵᱟᱹᱭ ᱛᱮ ᱵᱮᱨᱮᱫ ᱠᱟᱛᱮ ᱚᱲᱟᱜᱼᱨᱟᱪᱟ ᱠᱷᱚᱱ ᱵᱟᱹᱞᱴᱤᱧ ᱵᱟᱵᱮᱨ ᱥᱟᱵ ᱠᱟᱛᱮ, ᱴᱤᱧ ᱵᱷᱟᱹᱨᱭᱟᱹ ᱜᱚᱜ ᱠᱟᱛᱮ ᱛᱟᱞᱟ ᱠᱩᱞᱦᱤ ᱯᱟᱠᱟ ᱠᱩᱧ ᱛᱮ ᱫᱟᱜ ᱞᱩᱞᱩᱭ ᱢᱚᱸᱦᱰᱟᱭᱮᱱ ᱫᱟᱜ ᱞᱩᱞᱩ ᱛᱩᱞᱩᱡ ᱥᱮᱛᱮᱧ ᱡᱷᱟᱨᱱᱟ ᱫᱟᱜ ᱞᱮᱠᱟ ᱟᱡᱟᱜ ᱢᱮᱫ ᱠᱤᱱ ᱠᱷᱚᱱ ᱦᱤᱰᱤᱨᱼᱦᱤᱰᱤᱨ ᱢᱮᱫ ᱫᱟᱜ ᱡᱚᱦᱟ ᱛᱩᱲᱩᱢ ᱠᱟᱛᱮ ᱠᱩᱧ ᱫᱟᱜ ᱨᱮ ᱡᱚᱨ ᱢᱮᱥᱟᱭᱮᱱᱟ᱾

ᱥᱤᱸᱜᱟᱹᱲ ᱵᱮᱲᱟ ᱮᱥᱠᱟᱨ ᱜᱮ ᱟᱡᱟᱜ ᱡᱟᱹᱯᱤᱫ ᱚᱲᱟᱜ ᱨᱮ ᱜᱤᱛᱤᱡ ᱠᱟᱛᱮ ᱠᱟᱨᱟᱱ ᱫᱚ ᱩᱭᱦᱟᱹᱨ ᱫᱚᱨᱭᱟ ᱨᱮ ᱩᱰᱩᱞ ᱰᱩᱵᱩᱞ ᱮ ᱯᱟᱭᱨᱟ ᱡᱚᱝ ᱠᱟᱱᱟ᱾ ᱩᱭᱦᱟᱹᱨ ᱮᱫᱟᱭ ᱼ ᱛᱮᱦᱮᱧ ᱢᱤᱫ ᱪᱟᱸᱫᱚ ᱠᱷᱚᱱ ᱟᱡ ᱞᱟᱹᱜᱤᱫ ᱛᱮ ᱱᱚᱶᱟ ᱚᱲᱟᱜ ᱨᱮᱭᱟᱜ ᱦᱚᱭ ᱦᱤᱥᱤᱫ ᱦᱚᱸ ᱵᱟᱹᱲᱤᱡ ᱟᱠᱟᱱᱟ᱾ ᱱᱚᱜᱼᱚᱭ ᱛᱮᱦᱮᱧ ᱥᱤᱢ ᱨᱟᱜ ᱛᱮ ᱟᱹᱡᱤᱡ ᱦᱟᱱᱦᱟᱨ ᱟᱭᱳ ᱜᱮᱛᱚ ᱛᱚᱜᱚᱡ ᱰᱟᱴᱟ ᱠᱟᱛᱮᱭ ᱮᱜᱮᱨ ᱞᱟᱜᱼᱟ᱾ ᱤᱧ ᱫᱚ ᱟᱢ ᱥᱟᱞᱟᱜ ᱫᱩᱧ ᱵᱷᱟᱜᱟᱣ ᱪᱟᱵᱟ ᱟᱠᱟᱱᱟ, ᱟᱫᱚ ᱪᱮᱫ? ᱟᱢᱟᱜ ᱡᱤᱭᱚᱱ ᱨᱮᱭᱟᱜ ᱴᱷᱤᱠᱟᱹᱧ ᱜᱚᱜ ᱟᱠᱟᱜᱼᱟ᱾ ᱱᱤᱛᱚᱜ ᱦᱚᱸ ᱥᱟᱰᱟᱝ ᱟᱠᱟᱱ ᱜᱮᱫᱚ᱾

ᱠᱟᱨᱟᱱᱟᱜ ᱢᱚᱱᱮ ᱡᱤᱣᱤ ᱫᱚ ᱱᱚᱶᱟ ᱠᱷᱟᱹᱛᱤᱨ ᱵᱟᱹᱲᱛᱤ ᱥᱟᱞᱟᱜ ᱵᱚᱠᱚᱜᱚᱜ ᱠᱟᱱ ᱛᱟᱭᱟ, ᱟᱡ ᱵᱟᱹᱦᱩ ᱠᱟᱹᱨᱢᱤᱭᱟᱜ ᱨᱤᱞᱟᱹᱢᱟᱞᱟ ᱡᱷᱟᱨᱱᱟ ᱫᱟᱜ ᱞᱮᱠᱟᱱ ᱢᱚᱱ ᱨᱮ ᱛᱤᱥ ᱠᱚᱨᱮ ᱦᱤᱸᱥᱟᱹ ᱨᱮᱭᱟᱜ ᱯᱟᱯ ᱚᱢᱚᱱ ᱯᱚᱴᱠᱚᱡ ᱠᱟᱛᱮ ᱯᱚᱦᱟ ᱫᱟᱨᱮ ᱨᱮᱭᱟᱜ ᱰᱚᱜᱽ ᱦᱚᱸ ᱥᱟᱜᱮᱱ ᱪᱟᱨᱟᱦ ᱜᱚᱫ ᱟᱠᱟᱱᱟ? ᱟᱡ ᱟᱭᱳᱣᱟᱜ ᱥᱤᱢᱨᱟᱜ ᱛᱮ ᱮᱜᱮᱨ ᱟᱸᱡᱚᱢ ᱠᱟᱛᱮ ᱦᱚᱸ ᱠᱟᱹᱨᱢᱤ ᱫᱚ ᱢᱟᱱᱟ ᱵᱟᱨᱚᱱ ᱠᱟᱛᱷᱟ ᱢᱤᱫ ᱩᱰᱤᱡ ᱦᱚᱸ ᱵᱟᱝ ᱮ ᱢᱮᱱ ᱨᱩᱣᱟᱹᱲ ᱞᱟᱜᱼᱟ, ᱦᱚᱭ ᱛᱚᱯᱟᱞᱮᱱ ᱠᱟᱹᱨᱢᱤ ᱫᱚ ᱟᱹᱡᱤᱡ ᱪᱷᱟᱛᱟ ᱫᱟᱨᱮ ᱠᱟᱨᱟᱱᱟᱜ ᱫᱤᱥᱟᱹ ᱧᱮᱞ ᱛᱮ ᱨᱟᱹᱥᱠᱟᱹᱭ ᱟᱴᱠᱟᱨᱮᱫ ᱛᱟᱸᱦᱮᱫ? ᱚᱲᱟᱜ ᱛᱮ ᱫᱟᱠᱟ ᱡᱚᱡᱚᱢ ᱵᱚᱞᱚᱱ ᱦᱚᱸ ᱛᱤ ᱡᱟᱸᱜᱟ ᱜᱚᱦᱚᱲᱚᱜ ᱠᱟᱱ ᱞᱮᱠᱟᱭ ᱟᱴᱠᱟᱨ ᱮᱫᱟ᱾ ᱟᱨ ᱵᱟᱥᱱᱟᱭ ᱪᱮᱫᱟᱜ? ᱮᱜᱮᱨ ᱟᱸᱡᱚᱢ ᱞᱟᱹᱜᱤᱫ? ᱡᱟᱦᱟᱸ ᱚᱲᱟᱜ ᱟᱡᱟᱜ ᱡᱤᱭᱚᱱ ᱨᱮᱭᱟᱜ ᱮᱭᱟᱭ ᱥᱮᱨᱢᱟ ᱠᱷᱚᱱ ᱮ ᱡᱚᱛᱚᱱ ᱡᱚᱜᱟᱣ ᱟᱹᱜᱩᱭᱮᱫᱟ, ᱚᱱᱟ ᱚᱲᱟᱜ ᱨᱮ ᱱᱤᱛᱚᱜ ᱟᱡᱟᱜ ᱞᱟᱹᱠᱛᱤ ᱵᱟᱹᱱᱩᱜᱼᱟ᱾ ᱰᱟᱺᱜᱽᱨᱤ ᱢᱮᱨᱚᱢ ᱠᱷᱚᱱ ᱮᱦᱚᱵ ᱠᱟᱛᱮ, ᱥᱤᱢ ᱥᱩᱠᱨᱤ ᱡᱚᱛᱚᱱ ᱡᱚᱜᱟᱣ, ᱵᱟᱹᱫᱽᱼᱠᱷᱮᱛ ᱨᱮᱭᱟᱜ ᱠᱟᱹᱢᱤᱼᱠᱟᱹᱥᱱᱤ ᱦᱚᱸ ᱛᱚ ᱟᱡ ᱜᱮᱭ ᱧᱮᱞ ᱥᱟᱢᱴᱟᱣ ᱮᱫᱟ᱾ ᱮᱱᱛᱮ ᱨᱮᱦᱚᱸ ᱫᱟᱜ ᱫᱟᱠᱟ ᱞᱟᱹᱜᱤᱫ ᱠᱟᱛᱷᱟ ᱚᱠᱚᱭ ᱦᱚᱸ ᱵᱟᱠᱚ ᱠᱩᱞᱤ ᱜᱮᱞᱟᱭᱮᱭᱟ᱾ ᱦᱟᱱᱟᱼᱱᱷᱟᱣᱟ ᱠᱟᱛᱷᱟ ᱠᱚ ᱩᱭᱦᱟᱹᱨᱼᱩᱭᱦᱟᱹᱨ ᱠᱟᱨᱚᱱ ᱫᱚ ᱛᱤᱱ ᱨᱮᱪᱚᱭ ᱡᱟᱹᱯᱤᱫ ᱜᱚᱫ ᱠᱟᱫᱟ ᱵᱟᱝ ᱮ ᱴᱷᱤᱠᱟᱹ ᱦᱟᱱᱟ᱾

ᱟᱪᱠᱟ ᱜᱮ ᱟᱡ ᱵᱟᱹᱦᱩ ᱠᱟᱹᱨᱢᱤ ᱫᱚ ᱠᱟᱨᱟᱢ ᱮ ᱡᱟᱹᱯᱤᱫ ᱟᱠᱟᱫ ᱚᱲᱟᱜ ᱛᱮ ᱵᱚᱞᱚ ᱠᱟᱛᱮ ᱠᱟᱨᱟᱱ ᱮ ᱴᱷᱮᱞᱟᱣ ᱵᱮᱨᱮᱫ ᱠᱮᱫᱮᱭᱟ᱾ ᱮᱹᱹᱹ ᱜᱳ! ᱱᱟᱥᱮᱱᱟᱜ ᱥᱟᱱᱛᱤ ᱧᱚᱜ ᱛᱮ ᱡᱟᱹᱯᱤᱫ ᱦᱚᱪᱚᱣᱟᱹᱧ ᱢᱮᱥᱮ᱾ ᱱᱮᱦᱚᱨ ᱥᱟᱞᱟᱜ ᱠᱟᱨᱟᱱ ᱫᱚ ᱟᱹᱡᱤᱡ ᱡᱤᱣᱤ ᱡᱩᱨᱤᱭ ᱢᱮᱛᱟ ᱦᱟᱫᱮ ᱛᱟᱸᱦᱮᱫ᱾ ᱪᱮᱫ ᱮᱢ ᱜᱮᱸᱫᱽᱨᱟᱜ ᱠᱟᱱᱟ? ᱫᱟᱠᱟ ᱡᱚᱢ ᱜᱮ ᱛᱩᱧ ᱦᱚᱦᱚᱣᱟᱢ ᱠᱟᱱᱟ᱾ ᱛᱚᱜᱚᱡᱽ ᱠᱷᱟᱱᱮᱢ ᱦᱤᱡᱩᱜ ᱢᱮ, ᱡᱚᱛᱚ ᱦᱚᱲ ᱠᱚ ᱡᱚᱢ ᱠᱮᱜᱼᱟ᱾

ᱛᱚᱜᱚᱡ ᱰᱟᱴᱟ ᱠᱟᱛᱮ ᱠᱟᱹᱨᱢᱤ ᱫᱚ ᱱᱚᱶᱟ ᱠᱟᱛᱷᱟᱭ ᱨᱚᱲ ᱨᱩᱣᱟᱹᱲ ᱞᱟᱜᱼᱟ᱾ ᱚᱲᱟᱜ ᱨᱤᱱ ᱡᱚᱛᱚ ᱦᱚᱲ ᱜᱮ ᱫᱟᱠᱟ ᱠᱚ ᱡᱚᱢ ᱥᱤᱨᱟᱹᱣ ᱟᱠᱟᱫ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱠᱟᱨᱟᱱᱟᱜ ᱵᱮᱨᱮᱞ ᱢᱟᱭᱟᱢ ᱨᱮ ᱥᱮᱸᱜᱮᱞ ᱫᱟᱹᱲ ᱠᱮᱫ ᱞᱮᱠᱟᱭ ᱵᱩᱡᱷᱟᱹᱣ ᱠᱮᱜᱼᱟ᱾ ᱪᱮᱫ? ᱪᱮᱫ ᱤᱧᱟᱜ ᱱᱩᱠᱩ ᱥᱟᱞᱟᱜ ᱢᱤᱫ ᱛᱮ ᱫᱩᱲᱩᱵ ᱠᱟᱛᱮ ᱫᱟᱠᱟ ᱡᱚᱢ ᱨᱮᱭᱟᱜ ᱟᱹᱭᱫᱟᱹᱨ ᱦᱚᱸ ᱵᱟᱹᱱᱩᱜ ᱛᱤᱧᱟ? ᱦᱮᱸ ᱱᱩᱠᱩ ᱫᱚᱠᱚ ᱚᱲᱟᱜ ᱢᱟᱹᱞᱤᱠ ᱠᱟᱱᱟ ᱟᱨ ᱤᱧ, ᱤᱧ ᱫᱚ ᱱᱚᱶᱟ ᱚᱲᱟᱜ ᱨᱮ ᱜᱷᱟᱹᱨᱫᱤ ᱡᱟᱶᱟᱭ ᱞᱮᱠᱟᱧ ᱦᱮᱡ ᱢᱮᱥᱟ ᱟᱠᱟᱱᱟ᱾ ᱟᱺᱭᱴᱷᱟᱹ ᱵᱟᱹᱴᱤ ᱨᱮ ᱤᱛᱟᱹᱫ ᱫᱟᱠᱟᱭ ᱥᱚᱦᱚᱨ ᱜᱤᱰᱤᱭᱟᱢ ᱨᱮᱦᱚᱸ ᱨᱮᱸᱜᱮᱡ ᱡᱟᱞᱟ ᱛᱮᱢ ᱡᱚᱢ ᱠᱟᱜ ᱜᱮᱭᱟ᱾ ᱱᱚᱶᱟ ᱚᱲᱟᱜ ᱨᱮᱜᱮ ᱛᱮᱦᱮᱧ ᱠᱷᱚᱱ ᱢᱤᱫ ᱪᱟᱸᱫᱳ ᱞᱟᱦᱟ ᱤᱧᱟᱜ ᱠᱚᱫᱚᱨ ᱦᱩᱭᱩᱜ ᱛᱟᱸᱦᱮᱱ᱾ ᱤᱧ ᱵᱟᱹᱦᱩ ᱟᱡᱟᱜ ᱥᱚᱦᱟᱜᱽ ᱫᱩᱞᱟᱹᱲ ᱛᱮ ᱢᱟᱨᱟᱝ ᱵᱳᱨᱳ ᱞᱮᱠᱟᱭ ᱥᱮᱵᱟ ᱡᱚᱛᱚᱱᱤᱧ ᱛᱟᱸᱦᱮᱫ, ᱥᱟᱫᱮᱨ ᱨᱤᱱᱤᱡ ᱢᱤᱫᱴᱟᱹᱝ ᱤᱨᱤᱞ ᱠᱚᱲᱟ ᱮᱸᱜᱟᱛ ᱟᱯᱟᱛ ᱠᱷᱚᱱ ᱦᱚᱸ ᱵᱟᱹᱲᱛᱤᱭ ᱢᱟᱱᱟᱣ ᱵᱟᱛᱟᱣᱤᱧ ᱛᱟᱸᱦᱮᱫ᱾ ᱩᱱ ᱫᱚ ᱤᱧᱟᱜ ᱡᱚᱛᱚᱣᱟᱜ ᱛᱟᱦᱮᱸ ᱠᱟᱱᱟ ᱚᱛᱼᱦᱟᱥᱟ, ᱴᱟᱠᱟᱼᱯᱩᱭᱥᱟᱹ ᱟᱨ ᱱᱤᱛ, ᱱᱤᱛ ᱢᱟ ᱤᱧ ᱮᱠᱷᱮᱱ ᱛᱤ ᱡᱷᱩᱱᱤ ᱥᱟᱦᱟᱱ ᱥᱮᱸᱜᱮᱞ ᱞᱮᱠᱟ᱾ ᱠᱟᱨᱟᱱᱟᱜ ᱢᱚᱱᱮ ᱡᱤᱣᱤ ᱫᱩᱨᱫᱩᱨᱟᱹᱣᱮᱱ ᱛᱟᱭᱟ᱾ ᱱᱤᱛ ᱜᱮ ᱚᱲᱟᱜ ᱥᱮᱱ ᱵᱚᱞᱚ ᱠᱟᱛᱮ ᱦᱟᱱᱦᱟᱨ ᱟᱭᱳ ᱟᱨ ᱤᱨᱤᱞ ᱠᱚᱲᱟ ᱥᱟᱶ ᱢᱤᱫᱼᱵᱟᱨ ᱠᱟᱛᱷᱟᱭ ᱨᱚᱯᱚᱲ ᱠᱤᱱᱟ, ᱢᱮᱱᱠᱷᱟᱱ ᱟᱡᱟᱜ ᱨᱟᱹᱜᱤ ᱠᱚᱲᱟᱢ ᱛᱟᱞᱟ ᱨᱮ ᱠᱩᱠᱩᱨᱵᱩᱫ ᱠᱟᱛᱮᱭ ᱦᱚᱸ ᱵᱩᱫᱽ ᱮᱫ ᱠᱟᱫᱟ᱾ ᱜᱤᱛᱤᱡ ᱠᱟᱛᱮ ᱜᱮ ᱠᱟᱨᱟᱱ ᱮ ᱢᱮᱱ ᱠᱮᱫᱟ ᱼ ᱵᱟᱝ ᱨᱮᱸᱜᱮᱡ ᱤᱧ ᱠᱟᱱᱟ ᱛᱮᱦᱮᱧ ᱫᱚ ᱵᱟᱹᱧ ᱡᱚᱢᱟ᱾ ᱠᱟᱹᱨᱢᱤ ᱫᱚ ᱢᱚᱪᱟ ᱦᱟᱱᱛᱮ ᱠᱟᱛᱮᱭ ᱢᱮᱱ ᱨᱩᱣᱟᱹᱲ ᱠᱮᱜᱼᱟ ᱼ ᱩᱸᱦ ᱡᱚᱢ ᱠᱮᱫ ᱠᱷᱟᱱ, ᱟᱢ ᱫᱚ ᱚᱠᱚᱭ ᱩᱠᱷᱲᱟᱹᱣᱟᱢ ᱠᱟᱱᱟ?

ᱠᱟᱨᱟᱱᱟᱜ ᱦᱩᱨᱩᱢ ᱰᱤᱜᱤᱨ ᱨᱟᱹᱜᱤ ᱢᱮᱫ ᱫᱟᱜ ᱨᱮ ᱵᱚᱫᱚᱞ ᱮᱱᱟ᱾ ᱱᱩᱭ ᱜᱮ ᱤᱧ ᱵᱟᱹᱦᱩ ᱡᱟᱸᱦᱟᱭ ᱠᱷᱟᱹᱛᱤᱨ ᱤᱧᱟᱜ ᱡᱚᱛᱚᱣᱟᱜ ᱤᱧ ᱟᱫ ᱟᱠᱟᱫᱟ᱾ ᱚᱛᱼᱦᱟᱥᱟ, ᱚᱲᱟᱜᱼᱫᱩᱣᱟᱹᱨ, ᱟᱭᱳᱼᱵᱟᱵᱟ᱾ ᱱᱤᱛ ᱚᱠᱟᱧ ᱪᱟᱞᱟᱜᱼᱟ? ᱪᱮᱫ ᱤᱧ ᱪᱤᱠᱟᱹᱭᱟ? ᱦᱟᱱᱦᱟᱨ ᱟᱭᱳ ᱦᱮᱡ ᱠᱟᱛᱮᱭ ᱢᱮᱱ ᱠᱮᱜᱼᱟ ᱼ ᱫᱟᱠᱟ ᱡᱚᱢ ᱢᱮ ᱪᱮᱫ ᱮᱢ ᱯᱚᱠᱯᱚᱠᱚ ᱟᱠᱟᱱᱟ ᱟᱢ ᱥᱟᱞᱟᱜ ᱦᱚᱯᱚᱱ ᱮᱨᱟᱧᱟᱜ ᱵᱟᱯᱞᱟ ᱦᱩᱭ ᱟᱠᱟᱱᱟ ᱢᱮᱱᱛᱮ ᱟᱢᱟᱜ ᱡᱤᱭᱚᱱ ᱵᱷᱩᱨ ᱨᱮᱭᱟᱜ ᱴᱷᱤᱠᱟᱹᱧ ᱜᱚᱜ ᱟᱠᱟᱫᱟ᱾ ᱱᱟᱪᱟᱨ ᱟᱲᱟᱝ ᱛᱮ ᱠᱟᱨᱟᱱ ᱮ ᱢᱮᱱ ᱨᱩᱣᱟᱹᱲ ᱠᱮᱫᱟ ᱼ ᱦᱮᱸ ᱭᱳ ᱟᱹᱞᱤᱧᱟᱜ ᱵᱷᱩᱞ ᱠᱟᱱᱟ ᱡᱮ ᱟᱹᱞᱤᱧ ᱱᱚᱝᱠᱟ ᱞᱤᱧ ᱩᱭᱦᱟᱹᱨ ᱡᱚᱝ ᱠᱟᱱ ᱛᱟᱸᱦᱮᱫ᱾ ᱟᱹᱞᱤᱧ ᱴᱷᱮᱱ ᱱᱤᱛᱚᱜ ᱪᱮᱫ ᱢᱮᱱᱟᱜᱼᱟ, ᱡᱮ ᱟᱹᱞᱤᱧᱟᱜ ᱡᱤᱭᱚᱱ ᱨᱮᱭᱟᱜ ᱴᱷᱤᱠᱟᱹ ᱵᱤᱱ ᱜᱚᱜᱟ᱾ ᱦᱟᱱᱦᱟᱨ ᱛᱮᱫ ᱵᱩᱴᱤᱼᱦᱚᱯᱚᱱ ᱮᱨᱟᱛ ᱠᱟᱹᱨᱢᱤ ᱜᱚᱦᱚᱲ ᱠᱟᱛᱮᱭ ᱢᱮᱱ ᱠᱮᱫᱟ ᱼ ᱫᱮᱞᱟ ᱱᱟ ᱟᱢ ᱦᱚᱸ ᱡᱟᱹᱯᱤᱫ ᱡᱚᱝ ᱢᱮ᱾ ᱱᱩᱭ ᱚᱠᱟᱨᱮᱢᱟ ᱫᱚ ᱟᱞᱚᱢ ᱦᱚᱨᱦᱚ ᱠᱟᱭᱟ᱾ ᱤᱱᱟᱹ ᱢᱮᱱ ᱠᱟᱛᱮ ᱴᱩᱠᱤ ᱞᱮᱠᱟ ᱢᱚᱪᱟ ᱯᱷᱩᱞᱟᱹᱣ ᱠᱟᱛᱮ ᱨᱟᱪᱟ ᱥᱮᱱ ᱯᱷᱤᱫᱽᱼᱯᱷᱤᱫᱽ ᱮ ᱵᱚᱞᱚ ᱪᱟᱞᱟᱣ ᱮᱱᱟ᱾

ᱮᱸᱜᱟᱛᱟᱜ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱠᱟᱹᱨᱢᱤᱭᱟᱜ ᱡᱟᱸᱜᱟ ᱞᱟᱛᱟᱨ ᱠᱷᱚᱱ ᱫᱷᱟᱹᱨᱛᱤ ᱥᱟᱦᱟ ᱜᱚᱫ ᱮᱱ ᱞᱮᱠᱟᱭ ᱟᱴᱠᱟᱨ ᱠᱮᱫᱟ᱾ ᱵᱟᱱᱟᱨ ᱢᱮᱫ ᱠᱷᱚᱱ ᱢᱮᱫ ᱫᱟᱜ ᱞᱤᱸᱜᱤᱱ ᱡᱷᱟᱨᱱᱟ ᱫᱟᱜ ᱞᱮᱠᱟ ᱡᱚᱦᱟ ᱛᱩᱲᱩᱢ ᱠᱟᱛᱮ ᱞᱤᱸᱜᱤ ᱟᱬᱜᱚᱭᱮᱱ ᱛᱟᱭᱟ᱾ ᱟᱞᱛᱟ ᱯᱟᱲ ᱥᱟᱹᱲᱤ ᱛᱮ ᱵᱟᱸᱫᱮᱭᱟᱠᱟᱱ ᱟᱧᱪᱟᱨ ᱛᱮ ᱢᱮᱫ ᱫᱟᱜ ᱡᱚᱡᱚᱫ ᱛᱩᱞᱩᱡ ᱪᱷᱟᱛᱟ ᱫᱟᱨᱮ ᱠᱟᱨᱟᱱᱟᱜ ᱜᱤᱛᱤᱡ ᱯᱟᱨᱠᱚᱢ ᱨᱮ ᱫᱩᱲᱩᱵ ᱠᱟᱛᱮ ᱠᱩᱥᱩᱫᱼᱠᱩᱥᱩᱫ ᱨᱟᱜᱼᱨᱟᱜ ᱮ ᱪᱷᱩᱴᱟᱹᱣ ᱮᱱᱟ᱾ ᱪᱮᱫᱟᱜ ᱵᱟᱭ ᱨᱟᱜᱟ? ᱨᱟᱜᱽ ᱜᱮᱭᱟᱭ, ᱜᱚᱢᱦᱮᱲ ᱩᱢᱩᱞ ᱪᱷᱟᱛᱟ ᱫᱟᱨᱮᱭᱟᱜ ᱫᱩᱠ ᱦᱟᱨᱠᱮᱛ ᱧᱮᱞ ᱠᱟᱛᱮ᱾ ᱡᱟᱸᱦᱟᱭ ᱛᱩᱞᱩᱡ ᱚᱲᱟᱜ ᱫᱩᱣᱟᱹᱨ ᱞᱟᱹᱜᱤᱫ ᱮ ᱠᱩᱠᱢᱩ ᱟᱠᱟᱜᱼᱟ, ᱡᱟᱸᱦᱟᱭ ᱥᱟᱞᱟᱜ ᱵᱟᱝ ᱮ ᱨᱚᱯᱚᱲ ᱞᱮᱱᱠᱷᱟᱱ ᱞᱟᱡ ᱫᱟᱠᱟ ᱵᱟᱝ ᱦᱟᱥᱟᱜ ᱛᱟᱭᱟ, ᱡᱟᱸᱦᱟᱭ ᱡᱤᱣᱤ ᱠᱷᱚᱱ ᱦᱚᱸ ᱵᱟᱹᱲᱛᱤ ᱮ ᱥᱤᱵᱤᱞ ᱟᱭᱟ, ᱩᱱᱤ ᱛᱮᱦᱮᱧ ᱟᱡᱟᱜ ᱟᱯᱟᱼᱵᱟᱨᱮ ᱚᱲᱟᱜ ᱨᱮ, ᱟᱡ ᱥᱟᱢᱟᱝ ᱨᱮ ᱨᱮᱸᱜᱮᱡ ᱛᱮᱛᱟᱝ ᱮᱜᱮᱨ ᱨᱚᱦᱮᱫ, ᱨᱮᱭᱟᱜ ᱠᱚᱪᱞᱚᱱ ᱮ ᱥᱟᱦᱟᱣ ᱟᱹᱜᱩᱭᱮᱫᱟ᱾ ᱠᱟᱹᱨᱢᱤᱭᱟᱜ ᱫᱩᱠ ᱫᱚ ᱱᱚᱶᱟ ᱜᱮ ᱠᱟᱨᱟᱱ ᱡᱩᱫᱤ ᱟᱯᱟᱼᱵᱟᱨᱮ ᱚᱲᱟᱜ ᱨᱮ ᱛᱟᱸᱦᱮᱱ ᱵᱟᱝ ᱮ ᱵᱚᱲᱦᱮ ᱞᱮᱠᱷᱟᱱ ᱥᱩᱞᱩᱠ ᱱᱤᱨᱟᱹᱭ ᱛᱮᱠᱤᱱ ᱛᱟᱦᱮᱸ ᱠᱚᱜᱼᱟ᱾ ᱤᱱᱟᱹ ᱥᱩᱢᱩᱝ ᱫᱚ ᱵᱟᱝ ᱟᱡ ᱦᱚᱸ ᱫᱩᱠ ᱥᱟᱥᱮᱛ ᱮᱢᱚᱜ ᱨᱮ ᱵᱚᱲᱦᱮ ᱛᱮᱭ ᱡᱟᱯᱟᱜ ᱞᱟᱴᱷᱟ ᱟᱠᱟᱱᱟ᱾ ᱛᱮᱦᱮᱧ ᱢᱤᱫ ᱪᱟᱸᱫᱳ ᱦᱩᱭᱩᱜ ᱠᱟᱱᱟ ᱟᱡ ᱡᱟᱶᱟᱭ ᱫᱩᱠᱼᱥᱩᱠ ᱨᱮ ᱜᱚᱲᱚ ᱵᱟᱭ ᱮᱢ ᱟᱠᱟᱣᱟᱫᱮᱭᱟ᱾ ᱫᱟᱜ ᱛᱮᱛᱟᱝ ᱫᱟᱠᱟ ᱨᱮᱸᱜᱮᱡ ᱪᱮᱫ ᱦᱚᱸ ᱵᱟᱝ ᱮ ᱠᱩᱞᱤ ᱟᱠᱟᱫᱮᱭᱟ᱾ ᱵᱚᱨᱪᱚᱝ ᱮᱸᱜᱟᱛ ᱟᱨ ᱵᱚᱠᱚᱛ ᱛᱮᱫᱟᱜ ᱛᱟᱲ ᱛᱮᱜᱮᱭ ᱥᱩᱦᱩᱠ ᱟᱹᱜᱩᱭᱮᱫ ᱛᱟᱸᱦᱮᱫ᱾ ᱢᱤᱫᱴᱟᱹᱝ ᱵᱟᱹᱦᱩ ᱠᱩᱲᱤᱭᱤᱡ ᱟᱡ ᱡᱟᱶᱟᱭ ᱜᱮ ᱡᱚᱛᱚ ᱪᱤᱞᱤ᱾ ᱛᱤᱨᱤᱼᱯᱩᱨᱩᱥᱟᱜ ᱥᱚᱝᱥᱟᱨ ᱡᱟᱞᱟ ᱨᱮ ᱥᱩᱜᱷᱩᱲ ᱛᱮ ᱛᱟᱲᱟᱢ ᱥᱟᱱᱟᱢ ᱠᱷᱟᱱ, ᱪᱷᱟᱛᱟ ᱫᱟᱨᱮᱭᱟᱜ ᱛᱤ ᱥᱟᱯᱟᱵ ᱠᱷᱚᱱ ᱫᱚ ᱟᱞᱚᱢ ᱯᱩᱪᱩᱡᱚᱜᱼᱟ᱾ ᱟᱯᱱᱟᱨ ᱡᱟᱶᱟᱭ ᱫᱩᱠ ᱮᱢ ᱫᱚ ᱥᱤᱱᱟᱹᱢ ᱢᱟᱨᱟᱝ ᱵᱳᱨᱳ ᱚᱱᱦᱮᱲᱟ ᱜᱮ ᱦᱩᱭᱩᱜᱼᱟ᱾ ᱱᱚᱶᱟ ᱠᱚ ᱴᱷᱤᱠᱟᱹ ᱠᱟᱛᱮ ᱦᱚᱸ ᱠᱟᱹᱨᱢᱤ ᱫᱚ ᱪᱮᱫ ᱦᱚᱸ ᱵᱟᱝ ᱮ ᱪᱤᱠᱟᱹ ᱫᱟᱲᱮ ᱟᱠᱟᱣᱟᱫᱟ᱾ ᱦᱚᱭ ᱛᱮ ᱯᱟᱞᱮᱱ ᱠᱟᱹᱨᱢᱤ ᱫᱚ ᱟᱯᱟ ᱵᱟᱨᱮ ᱚᱲᱟᱜ ᱢᱮᱱᱟᱭ ᱠᱷᱟᱹᱛᱤᱨ ᱟᱡᱟᱜ ᱯᱟᱲᱟᱜ ᱢᱚᱪᱟ ᱮᱸᱜᱟᱛ ᱛᱮᱫᱟᱜ ᱠᱟᱛᱷᱟ ᱨᱮ ᱵᱟᱝ ᱮ ᱫᱷᱟᱲᱟᱯ ᱨᱩᱣᱟᱹᱲ ᱫᱟᱲᱮᱭᱟᱜ ᱠᱟᱱᱟ᱾

ᱜᱤᱛᱤᱡ ᱯᱟᱨᱠᱚᱢ ᱠᱷᱚᱱ ᱩᱥᱠᱩ ᱯᱩᱥᱠᱩ ᱵᱮᱨᱮᱫ ᱠᱟᱛᱮ ᱠᱟᱨᱟᱱ ᱫᱚ ᱠᱟᱹᱨᱢᱤᱭᱟᱜ ᱵᱟᱱᱟᱨ ᱫᱟᱹᱵᱤ ᱥᱟᱵ ᱠᱟᱛᱮᱭ ᱠᱩᱞᱤ ᱠᱮᱫᱮᱭᱟ ᱼ ᱪᱮᱫᱟᱜ ᱮᱢ ᱨᱟᱜᱮᱫᱟ ᱜᱚ? ᱟᱭᱳᱭ ᱦᱚᱦᱚᱣᱟᱫ ᱢᱮ ᱫᱚ ᱫᱩ ᱪᱟᱞᱟᱜ ᱢᱮ᱾ ᱤᱧ ᱚᱠᱟ ᱨᱮᱢᱟ ᱫᱚ ᱪᱮᱫᱟᱜ ᱮᱢ ᱦᱚᱨᱦᱚ ᱟᱠᱟᱫᱤᱧᱟ?

ᱠᱟᱨᱟᱱᱟᱜ ᱴᱟᱴᱣᱟᱥ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱠᱟᱹᱨᱢᱤᱭᱟᱜ ᱢᱮᱫ ᱫᱟᱜ ᱫᱚ ᱛᱟᱹᱦᱩ ᱜᱮ ᱵᱟᱹᱲᱛᱤᱭᱮᱱ ᱛᱟᱭᱟ᱾ ᱪᱷᱟᱛᱟ ᱫᱟᱨᱮ ᱠᱚᱞᱮ ᱨᱮ ᱜᱩᱸᱜᱩᱫ ᱠᱟᱛᱮ ᱦᱚᱨᱤ ᱵᱤᱠᱚᱞᱮ ᱨᱟᱜ ᱦᱚᱢᱚᱨ ᱮᱫᱟ᱾ ᱢᱚᱪᱟ ᱠᱷᱚᱱ ᱪᱮᱫ ᱠᱟᱛᱷᱟ ᱦᱚᱸ ᱵᱟᱝ ᱚᱰᱚᱠᱚᱜ ᱠᱟᱱ ᱛᱟᱭᱟ᱾

ᱠᱟᱨᱟᱱ ᱜᱮ ᱡᱤᱣᱤ ᱡᱩᱨᱤᱭᱟᱜ ᱢᱮᱫ ᱫᱟᱜ ᱡᱚᱡᱚᱫ ᱛᱩᱞᱩᱡ ᱮ ᱢᱮᱱ ᱠᱮᱫᱟ ᱼ ᱦᱮᱸ ᱜᱚ ᱩᱭᱦᱟᱹᱨ ᱮᱫᱟᱹᱧ ᱟᱯᱮ ᱚᱲᱟᱜ ᱨᱮ ᱤᱧ ᱫᱚ ᱟᱫᱚ ᱵᱟᱹᱧ ᱛᱟᱦᱮᱸ ᱫᱟᱲᱮᱭᱟᱜᱼᱟ᱾ ᱦᱚᱭ ᱛᱚ ᱯᱟᱞᱮᱱ ᱤᱧᱟᱜ ᱢᱤᱫ ᱯᱩᱭᱥᱟᱹ ᱠᱟᱢᱟᱣ ᱵᱟᱹᱱᱩᱜᱼᱟ, ᱚᱱᱟᱛᱮ ᱟᱭᱳ ᱯᱷᱚᱠᱚᱴ ᱛᱮ ᱡᱚᱢᱟᱜ ᱮ ᱤᱢᱟᱹᱧ ᱠᱟᱱ ᱞᱮᱠᱟᱭ ᱵᱩᱡᱷᱟᱹᱣ ᱮᱫᱟ᱾ ᱟᱫᱚ ᱛᱤᱱᱟᱹᱜ ᱫᱤᱱ ᱨᱮᱸᱜᱮᱡ ᱛᱤᱧ ᱛᱟᱸᱦᱮᱱᱟ? ᱢᱚᱱᱮᱭᱮᱫᱟᱹᱧ ᱚᱲᱟᱜ ᱛᱤᱧ ᱨᱩᱣᱟᱹᱲ ᱪᱟᱞᱟᱜᱼᱟ᱾ ᱚᱲᱟᱜ ᱨᱮ ᱟᱭᱳ ᱥᱟᱶᱛᱮ ᱵᱚᱠᱚᱧ ᱱᱟᱨᱟᱱ ᱢᱮᱱᱟᱜ ᱠᱤᱱᱟ ᱦᱚᱭ ᱛᱚ ᱯᱟᱞᱮᱱ ᱩᱱᱠᱤᱱ ᱴᱷᱟᱶ ᱠᱤᱱ ᱤᱢᱟᱹᱧ ᱜᱮᱭᱟ᱾

ᱠᱟᱨᱟᱱᱟᱜ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱠᱟᱹᱨᱢᱤᱭᱟᱜ ᱢᱚᱱᱮ ᱡᱤᱣᱤ ᱨᱮ ᱱᱟᱥᱮ ᱨᱟᱹᱥᱠᱟᱹ ᱥᱮᱛᱮᱧᱟᱫ ᱫᱮᱭᱟ᱾ ᱛᱮᱦᱮᱧ ᱮᱭᱟᱭ ᱪᱟᱸᱫᱳ ᱨᱮ ᱠᱟᱨᱟᱱᱟᱜ ᱢᱚᱪᱟ ᱠᱷᱚᱱ ᱚᱲᱟᱜ ᱨᱩᱣᱟᱹᱲ ᱠᱟᱛᱷᱟᱭ ᱟᱸᱡᱚᱢ ᱠᱮᱫᱟ, ᱱᱚᱝᱠᱟᱭ ᱟᱴᱠᱟᱨ ᱠᱮᱫᱟ ᱡᱟᱹᱱᱤᱡ ᱟᱹᱠᱤᱱ ᱛᱤᱨᱤᱼᱯᱩᱨᱩᱥᱟᱜ ᱟᱜᱟᱢ ᱫᱚ ᱱᱤᱨᱟᱹᱭ ᱟᱨ ᱢᱟᱨᱥᱟᱞ ᱨᱮ ᱛᱟᱸᱦᱮᱱᱟ᱾ ᱠᱟᱨᱟᱱᱟᱜ ᱵᱚᱦᱚᱜ ᱩᱵ ᱦᱟᱛᱣᱟᱼᱦᱟᱛᱣᱟ ᱠᱟᱹᱨᱢᱤ ᱫᱚ ᱛᱮᱛᱟᱝ ᱟᱲᱟᱝ ᱛᱮᱭ ᱢᱮᱱ ᱞᱟᱜᱼᱟ ᱼ ᱦᱮᱸ ᱜᱚ ᱤᱧ ᱫᱚ ᱟᱫᱚ ᱵᱟᱢ ᱤᱫᱤ ᱛᱚᱨᱟᱭᱤᱧᱟ? ᱫᱩᱲᱩᱵ ᱠᱷᱚᱱ ᱵᱮᱨᱮᱫ ᱠᱟᱛᱮ ᱠᱟᱨᱟᱱ ᱮ ᱞᱟᱵᱷ ᱠᱮᱫᱟ ᱼ ᱤᱧᱟᱜ ᱱᱟᱶᱟ ᱛᱟᱹᱯᱤᱧ ᱠᱟᱱ ᱦᱩᱰᱤᱧ ᱜᱷᱟᱨᱚᱸᱡᱽ ᱨᱮ ᱟᱢᱟᱜ ᱞᱟᱹᱠᱛᱤ ᱢᱮᱱᱟᱜᱼᱟ᱾ ᱛᱟᱞᱜᱟᱼᱛᱟᱱᱟᱜᱚᱜ ᱠᱟᱱ ᱜᱷᱟᱨᱚᱸᱡᱽ ᱛᱤᱸᱜᱩ ᱠᱮᱴᱮᱡ ᱨᱮ ᱡᱩᱫᱤ ᱟᱢᱮᱢ ᱜᱚᱲᱚ ᱟᱹᱧᱟ, ᱮᱱᱠᱷᱟᱱ ᱤᱧᱟᱜ ᱠᱚᱯᱟᱲ ᱵᱟᱝ ᱮᱯᱲᱮᱭᱟ ᱢᱮᱱ ᱛᱤᱧ ᱢᱚᱱᱮᱭᱟ᱾ ᱟᱹᱰᱤ ᱫᱤᱱ ᱛᱟᱭᱚᱢ ᱠᱟᱨᱟᱱ ᱟᱨ ᱠᱟᱹᱨᱢᱤ ᱢᱚᱱᱮ ᱵᱷᱩᱞᱟᱹᱣ ᱡᱤᱣᱤ ᱨᱟᱲᱮᱡ ᱠᱟᱛᱷᱟ ᱟᱹᱠᱤᱱ ᱛᱟᱞᱟ ᱨᱮ ᱪᱮᱯᱮᱡ ᱦᱟᱹᱴᱤᱧ ᱠᱟᱛᱮ ᱡᱟᱹᱯᱤᱫ ᱥᱟᱲᱟᱼᱥᱟᱹᱛᱤᱧ ᱵᱮᱲᱟ ᱨᱮ ᱛᱤᱨᱤᱼᱯᱩᱨᱩᱥ ᱥᱟᱹᱜᱟᱹᱭ ᱠᱤᱱ ᱛᱚᱱᱚᱞ ᱟᱹᱨᱩ ᱞᱟᱜᱼᱟ᱾

ᱛᱟᱞᱟ ᱧᱤᱫᱟᱹ ᱵᱟᱨᱟᱵᱟᱹᱨᱤ᱾ ᱜᱚᱴᱟ ᱯᱟᱲᱟ ᱥᱟᱲᱟᱥᱟᱹᱛᱤᱧ ᱜᱮ ᱟᱹᱭᱠᱟᱹᱣᱚᱜ ᱠᱟᱱᱟ᱾ ᱠᱟᱨᱟᱱ ᱟᱨ ᱠᱟᱹᱨᱢᱤ ᱫᱚ ᱜᱤᱫᱽᱨᱟᱹ ᱞᱮᱴᱠᱟ ᱦᱮᱵᱮ ᱠᱟᱛᱮ ᱵᱟᱲᱜᱮ ᱫᱩᱣᱟᱹᱨ ᱛᱮ ᱚᱰᱚᱠ ᱠᱟᱛᱮ ᱚᱲᱟᱜ ᱢᱚᱦᱰᱟ ᱠᱤᱱ ᱛᱟᱲᱟᱢ ᱟᱠᱟᱫᱟ᱾ ᱠᱩᱱᱟᱹᱢᱤ ᱪᱟᱸᱫᱳ ᱛᱮᱨᱫᱮᱡ ᱢᱟᱨᱥᱟᱞ ᱨᱮ ᱮᱸᱜᱮᱞ ᱤᱯᱤᱞ ᱪᱷᱟᱲᱟ ᱪᱤᱞᱤ ᱦᱚᱸ ᱵᱟᱠᱚ ᱧᱮᱞᱚᱜ ᱠᱟᱱᱟ᱾ ᱛᱷᱟᱨᱮ ᱛᱷᱟᱨ ᱠᱚ ᱨᱟᱠᱟᱵ ᱟᱠᱟᱱ ᱤᱯᱤᱞ ᱡᱟᱱᱤᱡ ᱠᱚ ᱮᱱᱮᱡ ᱡᱚᱝ ᱠᱟᱱᱟ᱾ ᱮᱱᱮᱡ ᱡᱚᱝ ᱠᱟᱱ ᱮᱸᱜᱮᱞ ᱤᱯᱤᱞ ᱧᱮᱞ ᱠᱟᱛᱮ ᱛᱤᱱ ᱨᱮᱪᱚ ᱜᱤᱫᱽᱨᱟᱹ ᱢᱚᱱᱮ ᱨᱮᱭ ᱥᱮᱴᱮᱨ ᱟᱠᱟᱱᱟ ᱵᱟᱝ ᱮ ᱛᱷᱤᱛ ᱟᱠᱟᱣᱟᱱᱟ᱾ ᱩᱭᱦᱟᱹᱨ ᱮᱫᱟᱭ ᱟᱡ ᱦᱚᱸ ᱮᱸᱜᱮᱞ ᱤᱯᱤᱞ ᱞᱮᱠᱟ ᱜᱮ ᱟᱨᱦᱚᱸ ᱜᱟᱛᱮ ᱠᱚ ᱥᱟᱶ ᱮ ᱠᱷᱤᱞᱰᱩ ᱮᱱᱮᱡ ᱡᱚᱝ ᱛᱟᱸᱦᱮᱱ᱾ ᱢᱚᱱ ᱨᱮ ᱩᱭᱦᱟᱹᱨ ᱦᱤᱡᱩᱜ ᱠᱟᱱᱟ ᱡᱟᱱᱟᱢ ᱟᱹᱛᱩ ᱚᱲᱟᱜ᱾ ᱡᱟᱦᱟᱸ ᱨᱮ ᱟᱡ ᱨᱤᱱ ᱡᱚᱴᱟᱣ ᱢᱮᱱᱟᱜ ᱠᱚ ᱛᱟᱭᱟ ᱛᱮᱦᱮᱧ ᱩᱱᱠᱩ ᱥᱟᱶ ᱫᱚᱦᱲᱟ ᱛᱮᱭ ᱧᱟᱯᱟᱢ ᱨᱩᱣᱟᱹᱲᱟ᱾ ᱢᱚᱱ ᱨᱮ ᱩᱭᱦᱟᱹᱨ ᱦᱮᱡ ᱟᱫᱮᱭᱟ ᱡᱟᱱᱟᱢ ᱟᱭᱳᱣᱟᱜ ᱫᱩᱞᱟᱹᱲ᱾ ᱩᱱᱤᱭᱟᱜ ᱢᱩᱴᱷᱟᱹᱱ ᱨᱮ ᱛᱤᱱᱟᱹᱜ ᱫᱟᱭᱟ ᱟᱨ ᱢᱟᱭᱟ ᱦᱮᱱᱟᱜ ᱛᱟᱭᱟ᱾ ᱠᱟᱨᱟᱱ ᱱᱤᱛᱚᱜ ᱱᱚᱝᱠᱟᱭ ᱟᱴᱠᱟᱨ ᱮᱫᱟ ᱡᱟᱹᱱᱤᱡ ᱟᱡ ᱟᱭᱳ ᱫᱟᱨᱟᱢᱮ ᱢᱟᱲᱟᱝ ᱦᱤᱡᱩᱜ ᱠᱟᱱᱟ᱾ ᱠᱟᱨᱟᱱᱟᱜ ᱢᱮᱫ ᱠᱤᱱ ᱢᱮᱫ ᱫᱟᱜ ᱛᱮ ᱯᱮᱲᱮ ᱯᱮᱲᱮ ᱭᱮᱱ ᱛᱟᱭᱟ᱾ ᱟᱡ ᱟᱡ ᱛᱮᱭ ᱢᱮᱱ ᱡᱚᱝ ᱠᱟᱱᱟ ᱭᱳ ᱟᱢ ᱫᱚ ᱪᱮᱫᱟᱜ ᱮᱢ ᱦᱤᱲᱤᱧ ᱥᱟᱹᱨᱤ ᱠᱤᱫᱤᱧᱟ? ᱧᱮᱞ ᱢᱮᱥᱮ ᱟᱹᱢᱤᱡ ᱢᱟᱨᱟᱝ ᱵᱟᱹᱵᱩᱣᱟᱜ ᱫᱚᱥᱟ ᱱᱤᱛᱚᱜ ᱚᱠᱟ ᱞᱮᱠᱟ ᱦᱩᱭᱩᱜ ᱠᱟᱱᱟ᱾ ᱟᱢᱟᱜ ᱥᱤᱠᱷᱱᱟᱹᱛ ᱯᱟᱲᱦᱟᱣ ᱤᱧ ᱟᱸᱡᱚᱢ ᱞᱮᱠᱷᱟᱱ ᱤᱧᱟᱜ ᱱᱚᱝᱠᱟᱱ ᱫᱚᱥᱟ ᱫᱚ ᱵᱟᱝ ᱦᱩᱭ ᱠᱚᱜᱼᱟ᱾ ᱚᱱᱟ ᱞᱟᱹᱜᱤᱫ ᱛᱮ ᱤᱧᱮᱢ ᱤᱠᱟᱹ ᱠᱟᱹᱧᱟ ᱭᱳ᱾

ᱛᱟᱲᱟᱢ ᱛᱟᱲᱟᱢ ᱛᱮ ᱥᱤᱢ ᱨᱟᱜ ᱜᱚᱫ ᱮᱱᱟ᱾ ᱡᱟᱱᱟᱢ ᱟᱹᱛᱩ ᱨᱮᱱᱟᱜ ᱠᱩᱞᱦᱤ ᱫᱷᱩᱲᱤ ᱨᱮ ᱠᱟᱨᱟᱱ ᱟᱨ ᱠᱟᱹᱨᱢᱤ ᱫᱚ ᱯᱟᱹᱣᱲᱤ ᱠᱤᱱ ᱜᱤᱰᱤ ᱟᱠᱟᱫᱟ ᱮᱭᱟᱭ ᱥᱮᱨᱢᱟ ᱛᱟᱭᱚᱢ᱾ ᱥᱟᱹᱨᱤ ᱜᱮ ᱡᱟᱱᱟᱢ ᱟᱹᱛᱩ ᱨᱮᱭᱟᱜ ᱦᱚᱭ ᱦᱤᱥᱤᱫ ᱫᱚ ᱢᱚᱱ ᱡᱤᱣᱤᱭ ᱨᱟᱣᱟᱞ ᱜᱚᱫᱟ᱾ ᱚᱲᱟᱜ ᱨᱮᱭᱟᱜ ᱪᱷᱟᱴᱠᱟ ᱫᱩᱣᱟᱹᱨ ᱨᱮ ᱱᱟᱥᱮ ᱠᱤᱱ ᱛᱤᱸᱜᱩ ᱧᱚᱜ ᱮᱱᱟ᱾ ᱦᱚᱭ ᱛᱚ ᱯᱟᱞᱮᱱ ᱱᱚᱶᱟ ᱚᱲᱟᱜ ᱫᱩᱥᱟᱹᱣ ᱠᱟᱛᱮ ᱠᱤᱱ ᱥᱟᱦᱟ ᱥᱟᱺᱜᱤᱧ ᱞᱮᱱᱟ ᱚᱱᱟᱛᱮ ᱚᱲᱟᱜ ᱵᱚᱞᱚᱱ ᱦᱚᱸ ᱠᱤᱱ ᱚᱵᱚᱨᱥᱟᱜ ᱠᱟᱱᱟ᱾ ᱵᱚᱛᱚᱨ ᱥᱟᱛᱞᱟᱜ ᱚᱲᱟᱜ ᱨᱟᱪᱟ ᱠᱤᱱ ᱟᱫᱮᱨ ᱵᱚᱞᱚᱭᱮᱱᱟ᱾ ᱢᱟᱨᱟᱝ ᱯᱤᱸᱰᱟᱹ ᱨᱮ ᱪᱟᱣᱞᱮᱭ ᱜᱩᱜᱼᱜᱩᱢ ᱠᱟᱱ ᱟᱭᱳ ᱩᱱᱠᱤᱱ ᱧᱮᱞ ᱛᱮᱭ ᱢᱮᱱ ᱜᱚᱫ ᱠᱮᱫᱟ, “ᱢᱟᱨᱟᱝ ᱵᱟᱹᱵᱩ ᱟᱹᱵᱤᱱ ᱵᱤᱱ ᱦᱮᱡ ᱮᱱᱟ᱾ ᱢᱟ ᱱᱚᱛᱮ ᱚᱲᱟᱜ ᱥᱮᱱ ᱜᱮ ᱵᱚᱞᱚᱱ ᱵᱤᱱ᱾ ᱟᱹᱵᱤᱱ ᱵᱟᱝ ᱛᱮ ᱱᱚᱶᱟ ᱚᱲᱟᱜ ᱧᱤᱨ ᱵᱟᱹᱜᱤ ᱟᱠᱟᱣᱟᱫ ᱚᱲᱟᱜ ᱞᱮᱠᱟ ᱵᱩᱡᱷᱟᱹᱜ ᱠᱟᱱ ᱛᱟᱸᱦᱮᱫ᱾”

ᱡᱟᱱᱟᱢ ᱟᱭᱳᱣᱟᱜ ᱱᱚᱶᱟ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱟᱹᱠᱤᱱᱟᱜ ᱞᱟᱸᱜᱟ ᱦᱚᱲᱢᱚ ᱟᱡ ᱟᱡ ᱛᱮ ᱯᱟᱸᱰᱜᱟᱨ ᱮᱱ ᱞᱮᱠᱟ ᱠᱤᱱ ᱟᱹᱭᱠᱟᱹᱣ ᱠᱮᱫᱟ᱾ ᱚᱲᱟᱜ ᱨᱮᱭᱟᱜ ᱨᱟᱪᱟ ᱨᱮ ᱯᱟᱹᱣᱲᱤ ᱧᱩᱨ ᱮᱱ ᱛᱟᱭᱚᱢ ᱠᱟᱨᱟᱱ ᱱᱚᱝᱠᱟ ᱨᱟᱹᱥᱠᱟᱹᱭ ᱟᱴᱠᱟᱨ ᱠᱮᱫ ᱫᱚ ᱡᱟᱹᱱᱤᱡ ᱟᱡᱟᱜ ᱡᱤᱭᱚᱱ ᱨᱮ ᱪᱮᱫ ᱦᱚᱸ ᱚᱜᱷᱚᱴᱚᱱ ᱵᱟᱝ ᱦᱩᱭ ᱟᱠᱟᱱᱟ᱾ ᱚᱱᱟ ᱚᱲᱟᱜ ᱡᱟᱦᱟᱸ ᱢᱤᱫ ᱫᱤᱱ ᱮ ᱵᱟᱹᱜᱤᱭᱟᱫ ᱛᱟᱸᱦᱮᱫ, ᱡᱟᱱᱟᱢ ᱟᱭᱳ ᱡᱟᱸᱦᱟᱭ ᱵᱟᱝ ᱮ ᱠᱩᱥᱤ ᱟᱭ ᱛᱟᱸᱦᱮᱱ, ᱩᱱᱠᱤᱱ ᱛᱮᱦᱮᱧ ᱤᱧ ᱵᱟᱹᱯᱩᱲᱤᱡ ᱟᱹᱠᱤᱱᱟᱜ ᱠᱚᱲᱟᱢ ᱠᱚᱞᱮ ᱨᱮ ᱜᱩᱸᱜᱩᱫ ᱞᱟᱹᱜᱤᱫ ᱛᱮᱭᱟᱨ ᱨᱮ ᱢᱮᱱᱟᱜ ᱠᱤᱱᱟ᱾ ᱞᱟᱡᱟᱣ ᱨᱮᱭᱟᱜ ᱦᱟᱢᱟᱞ ᱵᱷᱟᱹᱨᱭᱟᱹ ᱛᱮ ᱛᱮᱱ ᱟᱠᱟᱱ ᱠᱟᱨᱟᱱ ᱟᱨ ᱠᱟᱹᱨᱢᱤᱭᱟ ᱵᱚᱦᱚᱜ ᱛᱮᱦᱮᱧ ᱠᱩᱴᱩᱵᱩᱨ ᱨᱮ ᱢᱮᱱᱟᱜᱼᱟ᱾