बुधनी ओड़ाक् खोनाक् ए ओडोकेना, चेद् हों बाय सोंगे तोरा आकादा। जाहाँ सा़ड़ी होला होरोक् कातेय जा़पिद् लाक्-आ, ओना सा़ड़ी तेगेय ओडोकेना। आज् रिन गिदरा़ कोदो जा़पिद् रेगेय बा़गी होटोवाद् कोवा, ओकोय गिदरा़ हों बाको ठिका़ दाड़ेयादेया आर आज् जावाँयाक् काथा दो ला़य गे बाय गानोक्-आ। उनि खा़तिर तेगे तो नोवा ओडोक, नोवा ञिर चालाव मा। बुधनी आदो बाय साहाव दाड़ेयाक् काना, जाहाँ सेन गेय चालाक्-आ, मोने उरिज् आकादाय। मासे दिना़म गे ओकोय भालाय दाल होचोक्-आ, देया दो चेद् उना़क् आलका हाक् काना? नुय बुल-भुता़ड़ सालाक् दो आदो बाय गानोक्-आ, नुय दो ञिर बा़गीयाय तेगे हुयूक्-आ, नुयाक् नाहाचार दो आदो बाङ साहाक् काना। आरहों बुधनीय उयहा़र केद्-आ, नोडे खोनाक् चालाव काते गेबाङ ओकातेय चालाक्-आ, आपा-बारे ओड़ाक् रेहों नितोक् सेंगेल सुसुरबाङ लेकान हिलीदा़य तेकोवाक् राजोततो। जिवी राड़ेज् ला़गिद् एम चालाक् रेहों मिद् दिन गान हों बाम ताहें दाड़ेयाक्-आ। बाङ नोवा जिवी गे बाय दोहोया, बुधनी गोटा उरिज् केद्-आ। नोवा जिवी दोहो काते गेबाङ चेद् लाभ।
नोवा नासाव काथा दो बुधनी आ़डिधाव गे आजाक् मोने रेय इदि-आ़गु आकादा, मेनखान साहोंस गे बाय साहोंस दाड़े आकादा। मासे चिका़ ते मोन रे हेज् गोद् आय खान गे बाहा लेकान होपोन मा़याक् चेहरा गेय उयहा़र गोदा आर लाहा आकान ताड़ाम पावड़ी ठाकेद् गोदोक् ताया। आज् बाङ ताँहेन रे मासे होपोन मा़य दो ओकोये ञेलेया। आज् बाबाहाक् मा ठिका़न गे बाङ ताय। आज् ए गोज् एन खान उनि मा छुटकिय आ़गु जोङ-आ, गिदरा़ कोदो को जाहाँयेन गे। होपोन मा़य ला़गिद् छुटकी एँगात, बाङ, बाङ नोवा दो एकाल बाय हुय दाड़ेयाक्-आ।
होलानाक् नेयाव आर तापाम पोरे दो बुधनी नोवा को काथा चेद् हों बाय उयहा़र लाक्-आ। गिदरा़ कोवाक् कुची मेद् आहा ञेल काते लाहा आकान ताड़ाम पावड़ी ताय बाय ठाकेद् लेना। एकाल गिदरा़ को बा़गी होटो कातेय ओडोक हेज् एना। मोने उरिज् केद्-आय। रेल गा़डी तेय तेन गुजूक्-आ। आरहोंय उयहा़र गोद् केद्-आ, बाङ रेल गा़डी तेदो बाय तेन गुजुक्-आ, पाछे जाहाँ लेकाय बाञचाव एमान लेनखान आरहों बोदनाम, गोटा पाकाड़ रिन होड़ाक् रोड़ आँजोम हुयूक्-आ। आरबाङ जुरी रेल गाड़ी ते तेन काते जिवी बाङ चालाव काते खा़ली मिद्टा़ङ गान जाँगा गे गा़ँडिज् एमान लेनखान ताय आरहों होड़ भोरसा ते जिवीद् ताँहेन हुयूक् ताया। आदो बुधनी रेलगा़डी ते तेन काते गुजूक् रेयाक् काथा मोने खोनाक् ए साहा उता़र केद्-आ। मासे रेलगा़डी तेय गोज् लेन खान आजाक् गोज् मा़ड़ी ञेल ते गिदरा़ को चेद् लेका गिदी-कुड़ीद् लेका को रागा दाया गे। सुर ओड़ाक् रिनिज् मिद्टा़ङ कुड़ी होपोनाक् रेल ला़यिन रे गुजूक् ए ञेल लाक् ताँहेन। बुधनी ओना ञेञेल ए उयहा़र गोद् केक् खान कोड़ाम दोलोब्-दोलोब् लाड़ावेन ताया। बाङ-बाङ रेल ला़यिन रेदो एकाल बाय गुजूक्-आ, गोटा उरिज् केक्-आय।
बुधनीयाक् रा़गी दो नित हों बाङ राड़ेज् आकान ताया, बुरू सेंगेल लेका धा़व-धा़व जुलूक् कान ताया। बाङ, बाङ नोवा जिवी दोहो काते दो चेद् हों लाभ गे बा़नुक्-आ। दिना़म तिना़क् नाहाचारेम साहावा, नाहाचार साहाव रेयाक् हों तो सिमा़ मेनाक्-आ। मेनखान आजाक् जियोन रेमा नोवा रेयाक् सिमा़ गे बा़नुक्-आ। निता़क् दिना़म हिलोक् दाल दोम साहावा? नुय कोड़ा होपोन जुदी माड़ाङ खोनाक् ए नोङका कोक्-आ, ताहले तिना़क् दिन रेय ञिर बा़गीयाया हुना़ङ। मेनखान गिदरा़ पिदरा़ को ओमोनेन खान बुधनी ञिरूक् रेयाक् काथा बाय उयहा़र दाड़ेयाक् ताँहेन। होला ञिदा हाक् नेयाव खोनाक् दो जिवी गे बाङ दोहोय रेयाक् ए गोटा उरिज् आकादा।
बुधनी मिद् मोन तेय ताड़ाम आकादा, एतोम-कोंये ओकासेन हों बाय कोयोक् एदा पाछे जाहाँ चिनहा़प होड़ ञेल एमानेया। चिनहा़प होड़ को ञेल ञाम लेखान निजेराक् मोने उरिज् काथा पालटाक्-आ। बुधनी ताला सोड़ोक तेय ताड़ाम आकादा ओका सेन हों बाङ कोयोक् काते। टाटका गे मिद्टा़ङ पुन चाका गा़डी आज् सोझे सुर ते हेज् काते तिंगुयेना आर ओना गा़डी खोनाक् बार होड़ ओडोक काते गारजाव आते रोहेद् किन लागावेना। बुधनी चेद् हों बाय ठिका़ दाड़ेयाक् काना चेद् रे चेद् चिका़येना? चेदाक् उनि ञेल ते उना़क् गारजाव आते होड़ को रोहेदेक्-आ, बाय बुझा़व दाड़ेयाक् काना। आज् मातो ठिक होर तेगेय चालाक् काना, ओना रे होड़ाक् उना़क् चेदाक् आपोत्ती ताको? तायनोम ते ञेल दो आज् दो ताला सोड़ोक रे मेनाया ओनाते उना़क् होड़ कोदो को रोहेद् एदा। सेताक्-ञिदा़ पा़ली रेयाक् का़मी पुरा़व काते होड़ को लोगोन-लोगोन ओड़ाक् रूवा़ड़ सानायेद् कोवा। ओनाते उना़क् भिड़ आकाना, काजे गे ताला सोड़ोक तेम ताड़ाम इदि खान होड़ को रोड़ गेया। जाँहाय एमानाय गा़डी ते तेन एमान लेनखान गा़डी मा़लिकाक् तिना़क् झामेला? बुधनी मोने-मोने तेय लाँदा केद्-आ, आज् मातो ओना गेय खोजोक् काना। जाँहायाक् गे गा़डी तेय तेन गुजुक्-आ। मेनखान गुजुक् दो उना़क् आलगा हा? बाङ गुजुक् दो उना़क् आलगा तेदो बाय हुयूक्-आ। बुधनी होड़ कोवाक् गारजावा आते रोहेद् आँजोम ते सोड़ोक खोनाक् धारे तेय हेज् एना। होड़ कोवाक् भीड़ बा़य-बा़य ते चाबायेना, सारेज् ताहें एना खा़ली ओना गा़डी, जाहाँ तेय तेन गुजुक् कान ताँहेन। ञेले दोय ओना गा़डी रिनिज् डायबोर दो मिद्टा़ङ ञुतूमान गुनडा़ कानाय। खोबोर कागोज आर सा़ँगिञ ञेनेलोम कोरे उनियाक् चिता़र ए ञेल आकाद् ताया। उनि बाबोत ते आ़डि होड़ आ़डि लेकान काथा को ला़या, खोबोर कागोज कोरे हों आ़डि किछु गेको ओला। उनि दो चेता पुयसा़ हाताव काते होड़ ए गोज् कोवा। जाँहाय सालाक् रागदा-रा़गदी बाय ताँहेन, उनि बा़यरी बाय हुयूक् रेहों उनि गोज् ला़गिद् पुयसा़य ञाम लेखान उनि दो गोजे गेया। ला़याको उनियाक् दाया-माया लेकान आ़ड़ा़ दो आजाक् बोहोक् हाताङ रेदो बा़नुक्-आ। मेरोम-भिडी गोज् को लेका होड़ ए माक् गोज् कोवा। नोवा गे उनियाक् पेसा दो। बुधनी मोने-मोने तेय उयहा़र केद्-आ, नुना़क् निरमाया होड़ हों आज् दो बाय गोज् लादेया। चेदाक्? चेद् खा़तिर? बुधनीयाक् बोहोक् रे कुकली राकाब् एना। चेद् आजाक् दो तेहेञ गुजूक् बा़नुक् आन ताया? से आजाक् सेर-चावले दो बाय चाबा आकाना? उनि गुनडा़ ला़गिद् मा होड़ गोज् मा चाय ञुय लेकान आलगा का़मी काना। उनि मा हुना़ङ आजाक् पुन चाका गा़डी तेय तेन गोज् केया। उनियाक् मा दाया-माया चेद् हों बा़नुक् आन ताया, ताहले चेदाक् ए बाञचाव केदेया जुर ते ब्रेक लागाव काते। पालेन खान तेहेञ दो आजाक् गुजूक् माहा दो बाङ काना। बुधनी नोवा कोगे मोने रेय इदि आ़गुयेद् ताँहेन आर होर-होर तेय ताड़ाम इदियेद् ताँहेन। आदो नितोक् गुजूक् रेयाक् काथा दो बाय उयहा़र एदा, खा़ली सोड़ोक तेय ताड़ाम इदियेदा।
बुधनी नागार रेयाक् एटाक् पाहटा रेको जाँवाय आकादे बोकोत कुड़ी तेकोवाक् ओड़ाक् ए तियुक् केदा। ओड़ाक् बोलोन माड़ाङ आज् दो भा़गी लेकाय हुतूम फारायेना आर बेहोक् उब् थापा बाड़ा काते भा़गी लेकाय रोद् एना। बाँदेन सा़ड़ी हों दानाङ रे भा़ँदुड़ काते भा़गी लेकाय कासो बाँदेयेना, जाते बोकोत कुड़ी नोवा बाय ठिका़ दाड़ेयाक् मा आज् दो ञिर कातेय हेज् आकाना।
सेताक्-सेताक् आज् ञेल काते बोकोत कुड़ी दा़नगी हों हाहाड़ा सालाक् ए रा़सका़येना। मिद् लोटा दाक् आ़गु कातेय गोड आदेया आर गिदरा़ कोहोंय गोड होचो केद् कोवा।
– ‘‘हें दा़य आ़डि सेताक्-सेताक् एम हिरी केद् लेदो, ओड़ाक् रे बुगी बाड़ा गे मेनाक् पेया तो?’’ दा़नगी कुकलीय दोहो केक्-आ।
– ‘‘हें गे मा़य ओड़ाक् रेदो बुगी बाड़ा गे मेनाक् लेया, आदो आ़डि दिन खोन बा़ञ हिरी आकाद् पेया सेताक्-सेताक् इञ हेज् एना।’’ बुधनी आ़डि कोसटो सालाक् काथा रेयाक् तेलाय एम केद्-आ।
– ‘‘मा आम दो दुड़ूब् हानताड़ोक् मे, इञ दो का़टिज् लोलो दाक् इञ बेनाव लेगे।’’ ला़य काते दा़नगी दो ओड़ाक् भीतरी सेन ए बोलोयेना।
बुधनीय ञेल केदा, जाहाँ आज् सालाक् घोटाव आकाना, ओना दो नोडे हों हुय आकान गेया। नोवा मा माड़ाङ खोनाक् गेय बाडाया जे जावाँय दोय बुल-माताल गेया। आ़किन ताला रे नेयाव-तापाम दो जाव गे हुय बाड़ाक् गेया। तेहेञ होंय ञेल एदा होय दाक् दो नोडे हों हेज् लेन गेया, ओना दो दा़नगीयाक् लोहोद् मेद् आर ओदा कोड़ाम ञेल तेगे बाडायोक् कान ताँहेन। मासे जाहाँ रा़गी आर दुक सेंगेल इणिज् ला़गिद् आज् नोडेय हेज् लेन ताँहेन ओना सेंगेल मा नोडे हों जुलूक् कान गेया। मेनखान सेंगेल दो जाहाँ तिना़क् गे जुल राकाब् होचोनोक् से दा़नगीयाक् सुझ-बुझ आर साँहोस ते ओना सेंगेल दो आकोवाक् सोङसार सा़ड़िम दो ठिक गे मेनाक्-आ। दा़नगी रिन गिदरा़ नितोक् नागार रेयाक् बेस स्कुल रे भा़गी लेका को पाड़हाक् काना। नोवा ला़गिद् दा़नगी दो आ़डि खाटाव हुयूक् कान ताया, सेताक् तोरा बेरेद् काते इसिन-बासाङ चाबा काते गिदरा़ को स्कूल तेय भेजा कोवा आर आज् दो सिला़य का़मी रेय लागाक्-आ। हाने मैट्रिक पास काते गे दा़नगी दो नोडे को जाँवाय लादेया आर नितोक् एम0 ए0 पास काते बी0 एड0 ए पाड़हाक् काना। आसा मेनाक् ताया जाँहान स्कूल कोरे चेचेद् दा़य लेकातेय का़मीया आर जाँवायाक् दो चेद् भोरसा उनि मा सेताक् आ़युब् ए बुल कोक्-आ, ओड़ाक् रेयाक् चेद् हों गे बाय का़मीया। ओना चेतान रे दिना़म हिलोक् उनियाक् नाहाचार। मेनखान दा़नगी दो नोवा को आनाट ताला खोनाक् गे होर बेनाव आकादा। गिदरा़ कोवाक् मेद् आहा सेन कोयोक् काते आगाम रेयाक् सोना पाका दोलान सेने मोहडा आकाना।
बुधनीय उयहा़र केद्-आ जाहाँ ओबोसता आजाक् ओड़ाक् रे मेनाक्-आ ओना दो दा़नगीयाक् ओड़ाक् रेहों मेनाक्-आ। मेनखान दा़नगी दो ओना को आनाट-जा़नुम झानटी दोन पारोम काते होय-बा़रडु होय दाक् ताला होरे बेनावेदा, आर आज् खान दो का़टिज् तालाङ हादार होय तेगेय रा़पुदोक् काना जिवी नासाव रेयाक् काथाय उयहा़रेदा। जाहाँ ञेल चेद् दा़नगीयाक् आज् ठेन खोनाक् दोरकार ताहें काना, ओना बाङ काते आज् गे दा़नगी ठेन ञेल चेद् हुयूक् कान ताया। बाङ आदो जिवी नासाव रेयाक् काथा दो एकाल बाय उयहा़रा। नितोक् हों तो चेद् हों बाङ चिका़ आकाना। आज् मा सिला़य का़मी मा हाने कॉलेज पाड़हाक् ओक्ते गेय चेद् लाक् ताँहेन आर पाड़हाव हों तो बी0 ए0 धा़बिज् माय पाड़हाव आकान गेया। आदो बुधनी ओंडे बाय ताहें दाड़ेयाक् ना, दा़नगी ठेन खोन बिदा़य हाताव काते सोझे मिद्टा़ङ स्कूल तेय चालावेना, ओंडे माचेद् को दोरकारोक् कान ताँहेन, खोबोर कागोज रे ओना रेयाक् ढा़रवाक् को एम लाक्-आ। मिद् हापता भितरी रे बिनीड हों हुयेना आर बुधनी दोय बाछावेना ओंडेनिज् चेचेद् दा़य लेकाते। ओना स्कूल दो ताहें काना सेताक् बेड़ा रेयाक् स्कूल। इना़ तायनोम दो बी0 एड0 रे भुरतीक् रेयाक् पाला। ओना हों खोबोर कागोज रे ढा़रवा़क् ओडोक लेनखान गे, जेतेयाक् सा़त-सापड़ाव रेगे मेनाया। गिदरा़ कोहों भा़गी स्कूल रेय भुरती केद् कोवा।
बुधनीयाक् जियोन जाहाँ काड़ाङ ञुता़त रे तोहोद् ता़किजोक् कान ताँहेन ओना काड़ाङ ञुता़त रेगे मिद्टा़ङ आसा रेयाक् डिबा़ मारसाले ञेल ञाम केद्-आ। आर आसा आर पा़तया़व मेनाक् ताया जे ओना डिबा़ मारसाल गे मिद् दिन हिलोक् सुक-सानती रेयाक् नावा बाले तारास रेदो बोदोलोक्-आ।
:- Chandra Mohan Kisku
Comments
Post a Comment