ᱱᱚᱶᱟ ᱫᱷᱟᱹᱨᱛᱤ ᱨᱮ ᱴᱩᱸᱰᱟᱹᱝ ᱠᱟᱛᱮ ᱢᱟᱭᱱᱚ ᱫᱚ ᱢᱚᱴᱷᱮ ᱮᱭᱟᱭ ᱫᱷᱟᱣ ᱜᱮ ᱫᱟᱨᱮ ᱥᱟᱠᱟᱢ ᱧᱩᱨᱩᱜ ᱟᱨ ᱫᱟᱨᱮ ᱥᱟᱠᱟᱢ ᱥᱟᱜᱮᱱ ᱫᱚᱭ ᱧᱮᱞ ᱟᱠᱟᱫ ᱛᱟᱦᱮᱸ ᱠᱟᱱ ᱨᱮᱜᱮ ᱟᱭᱳᱼᱵᱟᱵᱟ ᱣᱟᱜ ᱟᱹᱰᱤᱼᱟᱹᱰᱤ ᱫᱩᱞᱟᱹᱲ ᱛᱮ ᱩᱱᱤᱭᱟᱜ ᱞᱟᱹᱵᱤᱫ ᱦᱚᱲᱢᱚ ᱫᱚ ᱠᱮᱴᱮᱡ ᱵᱟᱯᱞᱟ ᱛᱚᱱᱚᱞ ᱵᱟᱵᱮᱨ ᱛᱮ ᱛᱚᱞ ᱮᱱ ᱛᱟᱭᱟ ᱢᱩᱱᱥᱤᱭᱟᱜ ᱦᱚᱲᱢᱚ ᱥᱚᱸᱜᱮ᱾ ᱟᱭᱳᱼᱵᱟᱵᱟ ᱣᱟᱜ ᱟᱹᱰᱤ ᱥᱟᱱᱟ ᱟᱨ ᱨᱟᱹᱥᱠᱟᱹ ᱫᱚ ᱦᱚᱱᱼᱦᱚᱯᱚᱱ ᱠᱚᱣᱟᱜ ᱵᱟᱯᱞᱟ ᱜᱮ ᱟᱨ, ᱱᱚᱶᱟ ᱨᱟᱹᱥᱠᱟᱹ ᱜᱟᱰᱟ ᱨᱮ ᱢᱟᱭᱱᱚ ᱨᱮᱱ ᱟᱭᱳᱼᱵᱟᱵᱟ ᱦᱚᱸ ᱠᱩᱥᱤᱭᱟᱹ ᱠᱤᱱ ᱯᱟᱭᱨᱟᱣᱟᱱᱟ ᱢᱚᱱ ᱵᱷᱩᱨ᱾
ᱫᱤᱥᱚᱢ ᱦᱚᱲᱟᱜ ᱠᱩᱥᱤᱼᱨᱟᱹᱥᱠᱟᱹ ᱨᱮᱭᱟᱜ ᱟᱹᱭᱠᱟᱹᱣ ᱡᱩᱫᱟᱹᱼᱡᱩᱫᱟᱹ ᱜᱮ ᱛᱟᱠᱚᱣᱟ᱾ ᱚᱠᱚᱭ ᱫᱚ ᱱᱚᱶᱟ ᱛᱮᱭ ᱠᱩᱥᱤᱜᱼᱟ ᱟᱨ ᱚᱠᱚᱭ ᱫᱚ ᱦᱟᱱᱟ ᱛᱮ᱾ ᱟᱫᱚᱢ ᱫᱚ ᱩᱞ ᱡᱚᱢ ᱛᱮᱠᱚ ᱨᱟᱹᱥᱠᱟᱹᱜᱼᱟ ᱟᱨ ᱚᱠᱚᱭ ᱫᱚ ᱥᱟᱹᱯᱞᱤ ᱡᱚᱢ ᱛᱮ᱾ ᱢᱮᱱᱮᱠ, ᱚᱠᱟ ᱵᱮᱥᱟ ᱟᱨ ᱚᱠᱟ ᱵᱟᱹᱲᱤᱡᱼᱟ, ᱱᱚᱶᱟ ᱫᱚ ᱚᱠᱚᱭ ᱢᱮᱱ ᱠᱮᱭᱟ?
ᱢᱟᱭᱱᱚᱼᱣᱟᱜ ᱱᱚᱝᱠᱟ ᱵᱟᱯᱞᱟ ᱧᱮᱞ ᱛᱮᱦᱚᱸ ᱟᱫᱚᱢ ᱫᱚ ᱟᱹᱰᱤ ᱨᱟᱹᱥᱠᱟᱹ ᱠᱚ ᱟᱹᱭᱠᱟᱹᱣ ᱠᱮᱫᱟ ᱟᱨ ᱟᱫᱚᱢ ᱫᱚ ᱵᱟᱹᱲᱤᱡ ᱦᱚᱸ, ᱢᱮᱱᱠᱷᱟᱱ ᱢᱟᱭᱱᱚ ᱨᱮᱱ ᱢᱟᱢᱚ ᱦᱚᱧᱦᱟᱨ ᱛᱮᱫ ᱯᱨᱚᱫᱷᱟᱱ ᱫᱚ ᱠᱷᱟᱹᱴᱤ ᱜᱮ ᱵᱟᱹᱲᱤᱡ ᱮ ᱟᱹᱭᱠᱟᱹᱣ ᱠᱮᱫᱟ, ᱮᱱᱛᱮ ᱢᱟᱱᱶᱟ ᱡᱤᱭᱚᱱ ᱨᱮᱭᱟᱜ ᱵᱮᱥᱼᱵᱟᱹᱲᱤᱡ ᱛᱟᱞᱟ ᱨᱮ ᱢᱤᱫ ᱥᱚᱱᱚᱛ ᱦᱩᱫᱤᱥ ᱥᱟᱹᱨᱤᱭᱟᱜ ᱛᱮᱫ ᱦᱚᱸ ᱢᱮᱱᱟᱜᱼᱟ, ᱱᱚᱶᱟ ᱠᱟᱛᱷᱟ ᱫᱚ ᱯᱨᱚᱫᱷᱟᱱ ᱟᱹᱰᱤ ᱥᱩᱨ ᱠᱷᱚᱱ ᱜᱮᱭ ᱧᱮᱞ ᱛᱤᱭᱟᱹᱜ ᱟᱠᱟᱫᱟ᱾ ᱩᱱᱤ ᱫᱚ ᱟᱹᱰᱤ ᱫᱤᱱ ᱠᱷᱚᱱ ᱥᱟᱺᱜᱤᱧ ᱫᱤᱥᱚᱢ ᱛᱮ ᱱᱟᱞᱦᱟᱼᱛᱩᱢᱟᱹᱞ ᱮ ᱪᱟᱞᱟᱣ ᱟᱠᱟᱱ ᱛᱮ ᱚᱱᱟ ᱵᱟᱯᱞᱟ ᱨᱮᱭᱟᱜ ᱚᱲᱮᱼᱚᱲᱯᱟᱛ ᱵᱟᱭ ᱵᱟᱰᱟᱭ ᱞᱮᱫᱟ, ᱵᱟᱝᱠᱷᱟᱱ ᱡᱟᱹᱨᱩᱲ ᱜᱮᱭ ᱢᱮᱱ ᱠᱮᱭᱟ ᱼ ᱱᱚᱶᱟ ᱵᱟᱯᱞᱟ ᱫᱚ ᱵᱚᱱ ᱤᱠᱟᱹ ᱦᱟᱱᱛᱟᱲ ᱠᱟᱜᱼᱟ᱾ ᱵᱷᱟᱞᱟ, ᱱᱚᱶᱟ ᱫᱚ ᱪᱮᱫ? ᱜᱮᱞ ᱥᱮᱨᱢᱟ ᱨᱮᱱ ᱢᱩᱱᱥᱤ ᱟᱨ ᱮᱭᱟᱭ ᱥᱮᱨᱢᱟ ᱨᱮᱱ ᱢᱟᱭᱱᱚ, ᱥᱩᱢᱩᱝ ᱯᱮ ᱥᱮᱨᱢᱟ ᱨᱮᱭᱟᱜ ᱛᱚᱯᱷᱟᱛ᱾ ᱦᱟᱨᱟᱼᱵᱩᱨᱩ ᱠᱟᱛᱮ ᱡᱤᱭᱚᱱ ᱥᱟᱜᱟᱲ ᱱᱟᱯᱟᱭ ᱛᱮᱠᱤᱱ ᱴᱷᱮᱞᱟᱣ ᱫᱟᱲᱮᱭᱟᱜᱼᱟ ᱥᱮ ᱵᱟᱝ, ᱢᱮ~ᱢᱮᱱ ᱢᱩᱥᱠᱤᱞ ᱜᱮᱭᱟ᱾
ᱦᱮᱸ ᱢᱟᱭᱱᱚ ᱟᱨ ᱢᱩᱱᱥᱤ ᱫᱚ ᱟᱹᱛᱩ ᱟᱨ ᱥᱚᱢᱟᱡᱽ ᱨᱮᱱᱟᱜ ᱨᱟᱹᱥᱠᱟᱹ ᱤᱭᱟᱹ ᱛᱮ ᱠᱤᱱ ᱨᱟᱹᱥᱠᱟᱹ ᱞᱮᱱ ᱜᱮᱭᱟ᱾ ᱢᱟᱭᱱᱚ ᱫᱚ ᱱᱚᱶᱟ ᱤᱭᱟᱹ ᱛᱮ ᱰᱷᱮᱨ ᱨᱟᱹᱥᱠᱟᱹ ᱫᱚᱭ ᱵᱩᱡᱷᱟᱹᱣ ᱠᱮᱫᱟ ᱪᱮᱫᱟᱜ ᱡᱮ ᱩᱱᱤ ᱫᱚ ᱟᱡ ᱫᱟᱫᱟ ᱵᱟᱹᱵᱩᱞᱟᱞ ᱨᱮᱱ ᱵᱟᱹᱦᱩ ᱥᱮ ᱟᱡ ᱦᱤᱞᱤ ᱫᱤᱱᱟᱹᱢ ᱜᱮᱭ ᱧᱮᱞᱮᱭᱟ, ᱟᱹᱰᱤ ᱫᱩᱞᱟᱹᱲ ᱛᱮᱠᱚ ᱫᱚᱦᱚ ᱮ ᱠᱟᱱ ᱛᱟᱦᱮᱸ ᱠᱟᱱᱟ᱾ ᱟᱨ ᱢᱟᱭᱱᱚ ᱦᱚᱸᱭ ᱵᱷᱟᱹᱵᱤ ᱠᱮᱫᱟ ᱦᱟᱯᱮ ᱤᱧ ᱦᱚᱸ ᱤᱧ ᱡᱟᱶᱟᱭ ᱴᱷᱮᱱ ᱤᱧ ᱪᱟᱞᱟᱜᱼᱟ ᱟᱨ ᱟᱹᱰᱤ ᱫᱩᱞᱟᱹᱲ ᱛᱮᱠᱚ ᱫᱚᱦᱚᱭᱤᱧᱟ᱾ ᱢᱚᱱᱮ ᱨᱮᱭ ᱦᱩᱫᱤᱥᱟ ᱼ ᱯᱟᱥᱮ ᱤᱧ ᱡᱟᱶᱟᱭ ᱱᱷᱟᱜ ᱱᱚᱝᱠᱟᱭ ᱦᱚᱦᱚᱣᱟᱹᱧᱟ; ᱮᱹᱹᱹ ᱫᱮᱞᱟ ᱥᱮ ᱦᱮᱡ ᱞᱮᱱ ᱢᱮ᱾ ᱟᱫᱚ, ᱤᱧ ᱫᱚᱧ ᱢᱮᱛᱟᱭᱟ “ᱟᱹᱲᱤᱥ ᱜᱮᱢ ᱦᱚᱦᱚ ᱮᱫᱟ᱾ ᱪᱷᱤ! ᱵᱟᱹᱧ ᱪᱟᱞᱟᱜ ᱟᱢ ᱞᱟᱹᱜᱤᱫ᱾” ᱟᱨ ᱵᱟᱲᱜᱮ ᱥᱮᱫ ᱤᱧ ᱫᱟᱹᱲ ᱠᱮᱫ ᱜᱮ᱾ ᱠᱷᱚᱡᱮᱧ ᱠᱷᱟᱱ ᱫᱚᱧ ᱩᱠᱩ ᱛᱷᱤᱨ ᱠᱚᱜᱼᱟ ᱟᱨ ᱵᱟᱭ ᱧᱟᱢ ᱫᱟᱲᱮᱭᱟᱹᱧ ᱠᱷᱟᱱ ᱵᱟᱹᱭᱼᱵᱟᱹᱭ ᱛᱮ ᱩᱠᱩ ᱠᱟᱛᱮ ᱜᱮ “ᱵᱟᱹᱣ” ᱤᱧ ᱢᱮᱛᱟᱭᱟ᱾ ᱟᱫᱚ ᱵᱟᱱᱟ ᱦᱚᱲ ᱞᱤᱧ ᱞᱟᱸᱫᱟᱭᱟ ᱟᱨ ᱠᱷᱩᱵᱽ ᱞᱮᱠᱟ ᱞᱤᱧ ᱮᱱᱮᱡᱼᱟ᱾ ᱩᱠᱩᱼᱩᱠᱩ, ᱥᱤᱢ ᱜᱚᱭᱚᱨ ᱠᱟᱸᱰᱟᱣᱵᱤᱞᱤ, ᱪᱩᱢᱪᱩᱢᱵᱟ, ᱦᱮᱫᱮᱞ ᱜᱩᱰᱩ ᱮᱢᱟᱱ ᱛᱮᱭᱟᱜ᱾ ᱱᱚᱶᱟ ᱮᱱᱮᱡ ᱨᱮ ᱟᱹᱛᱩ ᱨᱮᱱ ᱜᱤᱫᱽᱨᱟᱹ ᱦᱚᱸ ᱠᱚ ᱥᱚᱸᱜᱮᱜᱼᱟ᱾ ᱡᱟᱸᱦᱟᱭ ᱥᱟᱶᱛᱮ ᱡᱩᱫᱤ ᱞᱟᱹᱲᱦᱟᱹᱭ ᱛᱟᱹᱱᱤᱡ ᱦᱩᱭᱩᱜ ᱠᱷᱟᱹᱱ, ᱤᱧ ᱡᱟᱶᱟᱭ ᱥᱟᱢᱟᱝ ᱨᱤᱧ ᱨᱟᱜᱟ᱾ ᱤᱱᱟᱹ ᱠᱟᱛᱮ ᱵᱟᱱᱟ ᱦᱚᱲ ᱛᱮ ᱫᱟᱞ ᱞᱤᱧ ᱫᱟᱞ ᱠᱚᱣᱟ ᱥᱮ ᱩᱱᱠᱩ ᱫᱚ ᱮᱠᱟᱞ ᱠᱚ ᱫᱟᱹᱲ ᱩᱛᱟᱹᱨᱟ, ᱟᱫᱚ, ᱦᱚᱦᱚ ᱠᱟᱛᱮ ᱞᱤᱧ ᱮᱜᱮᱨ ᱠᱚᱣᱟ ᱼ “ᱢᱟᱜᱟ ᱴᱩᱨᱩ ᱴᱩᱥᱤᱭᱟᱹ ᱱᱤᱫᱤᱨ ᱡᱚᱢ ᱠᱷᱟᱰᱭᱟᱹᱹᱹ”᱾ ᱢᱩᱱᱥᱤ ᱫᱚ ᱪᱮᱫ ᱠᱚ ᱪᱚᱝ ᱦᱩᱫᱤᱥ ᱠᱟᱛᱮ ᱵᱟᱯᱞᱟ ᱛᱟᱭᱚᱢ ᱟᱫᱚ ᱵᱮᱡᱟᱭ ᱨᱟᱹᱥᱠᱟᱹᱭ ᱟᱴᱠᱟᱨᱚᱜᱼᱟ᱾
ᱰᱷᱮᱨ ᱫᱤᱱ ᱛᱟᱭᱚᱢ ᱯᱨᱚᱫᱷᱟᱱ ᱫᱚ ᱱᱟᱞᱦᱟ ᱫᱤᱥᱚᱢ ᱠᱷᱚᱱ ᱚᱲᱟᱜ ᱛᱮᱭ ᱨᱩᱣᱟᱹᱲ ᱮᱱᱟ᱾ ᱢᱚᱱ ᱨᱮ ᱵᱷᱟᱹᱜᱽᱱᱟᱹᱛ ᱵᱟᱹᱦᱩ ᱧᱮᱞᱮ ᱨᱮᱭᱟᱜ ᱥᱟᱱᱟ ᱛᱟᱦᱮᱸ ᱠᱟᱱ ᱛᱟᱭ ᱨᱮᱦᱚᱸ ᱵᱮᱜᱚᱨ ᱱᱮᱣᱛᱟ ᱛᱮ ᱵᱷᱟᱞᱟ ᱪᱮᱠᱟ ᱛᱮᱭ ᱪᱟᱞᱟᱜᱼᱟ? ᱵᱮᱥ ᱟᱨ ᱵᱟᱹᱲᱤᱡ ᱫᱚᱢ ᱪᱮᱠᱟᱭᱟ? ᱦᱩᱭ ᱮᱱᱟ, ᱦᱩᱭ ᱮᱱᱟ᱾ ᱯᱟᱨᱚᱢ ᱮᱱᱟ, ᱪᱩᱠᱟᱹᱣ ᱮᱱᱟ᱾ ᱦᱤᱡᱩᱜᱟᱜ ᱫᱚᱢ ᱧᱮᱞ ᱫᱟᱨᱟᱢᱟ ᱟᱨ ᱚᱠᱟ ᱪᱩᱠᱟᱹᱣ ᱮᱱᱟ, ᱚᱱᱟ ᱫᱚᱢ ᱪᱮᱠᱟᱭᱟ? ᱚᱱᱮ ᱠᱚ ᱢᱮᱱ ᱞᱮᱠᱟ ᱼ “ᱚᱠᱛᱮ ᱫᱚ ᱛᱤᱭᱟᱱ ᱛᱮᱢ ᱥᱟᱵᱮᱭᱟ ᱥᱮ ᱡᱟᱸᱜᱟᱣᱟᱱ ᱛᱮᱢ ᱚᱨᱮᱭᱟ? “ᱵᱟᱯᱞᱟ ᱫᱚ ᱪᱟᱵᱟᱭᱮᱱᱟ, ᱯᱟᱨᱚᱢ ᱮᱱᱟ᱾ ᱫᱤᱥᱚᱢ ᱛᱮᱭᱟᱜ ᱠᱟᱛᱷᱟ ᱛᱟᱹᱱᱠᱷᱤ ᱢᱮ, ᱵᱮᱣᱦᱟᱨ ᱦᱚᱸᱭ ᱪᱩᱠᱟᱹᱣ ᱮᱱᱟ᱾ ᱛᱟᱭᱚᱢ ᱛᱮᱭᱟᱜ ᱠᱟᱛᱷᱟ ᱛᱟᱹᱱᱠᱷᱤ ᱢᱮ, ᱪᱮᱫ ᱦᱩᱭᱩᱜ ᱠᱟᱱᱟ? ᱱᱚᱝᱠᱟ ᱦᱩᱫᱤᱥ ᱠᱟᱛᱮ ᱯᱨᱚᱫᱷᱟᱱ ᱫᱚ ᱢᱤᱫ ᱫᱚᱢ ᱵᱷᱟᱹᱜᱽᱱᱟᱹᱛ ᱵᱟᱹᱦᱩ ᱧᱮᱧᱮᱞ ᱮ ᱪᱟᱞᱟᱜ ᱮ ᱢᱮᱱ ᱡᱚᱝ ᱠᱟᱱᱟ᱾ ᱟᱥᱚᱠᱟᱭ ᱛᱮ ᱟᱫᱚᱢ ᱦᱚᱲ ᱫᱚ ᱵᱟᱹᱦᱩ ᱧᱮᱞ ᱢᱮᱱᱛᱮ ᱯᱮᱲᱟ ᱫᱟᱠᱟ ᱠᱚ ᱡᱚᱢ ᱞᱟᱹᱜᱤᱫ ᱠᱚ ᱪᱟᱞᱟᱜᱼᱟ ᱟᱨ ᱚᱠᱚᱭ ᱫᱚ ᱩᱱᱠᱩᱣᱟᱜ ᱫᱟᱨᱦᱟᱨᱟ ᱚᱲᱟᱜᱼᱫᱩᱣᱟᱹᱨ ᱧᱮᱞ ᱦᱚᱸ᱾ ᱢᱮᱱᱠᱷᱟᱱ ᱵᱟᱹᱦᱩ ᱧᱮᱞ ᱢᱮᱱ ᱛᱮᱫᱚ ᱟᱹᱰᱤ ᱛᱷᱚᱲᱟ ᱦᱚᱲ ᱠᱚ ᱪᱟᱞᱟᱣ ᱵᱟᱲᱟᱜᱼᱟ᱾ ᱦᱮᱸ, ᱯᱨᱚᱫᱷᱟᱱ ᱫᱚ ᱠᱷᱟᱹᱴᱤ ᱜᱮ ᱵᱟᱹᱦᱩ ᱧᱮᱞ ᱜᱮ ᱥᱮᱱᱚᱜ ᱮ ᱢᱮᱱ ᱡᱚᱝ ᱠᱟᱱᱟ᱾
ᱯᱟᱥᱮᱡ ᱢᱤᱫ ᱪᱟᱸᱫᱳ ᱛᱟᱭᱚᱢ ᱠᱷᱟᱱ ᱱᱮᱣᱛᱟ ᱥᱮᱴᱮᱨ ᱮᱱᱟ ᱵᱟᱞᱮ ᱢᱟᱦᱟᱸ ᱦᱤᱞᱚᱜ ᱫᱤᱱ ᱫᱚ ᱱᱮᱰᱟ ᱩᱨᱤᱡ ᱮᱱᱟ᱾ ᱵᱷᱟᱹᱜᱽᱱᱟᱹᱛ ᱵᱟᱹᱦᱩ ᱞᱟᱹᱜᱤᱫ ᱯᱨᱚᱫᱷᱟᱱ ᱫᱚ ᱮᱢᱟᱱ ᱛᱮᱭᱟᱜ ᱡᱤᱱᱤᱥ ᱤᱫᱤᱭᱟᱭ ᱞᱟᱹᱜᱤᱫ ᱮ ᱚᱨᱟᱢ ᱠᱮᱫᱟ᱾ ᱤᱱᱠᱟᱹᱼᱤᱱᱠᱟᱹ ᱛᱮᱜᱮ ᱱᱮᱰᱟ ᱫᱤᱱ ᱫᱚ ᱛᱤᱭᱟᱹᱜ ᱮᱱᱟ᱾ ᱞᱟᱹᱰᱩᱼᱠᱷᱟᱹᱡᱟᱹᱲᱤ, ᱯᱩᱛᱞᱤᱼᱯᱷᱨᱚᱠ ᱠᱚᱭ ᱢᱚᱴᱨᱟ ᱠᱮᱫᱟ ᱟᱨ ᱚᱱᱟ ᱠᱚ ᱴᱮᱣᱮᱧ ᱠᱟᱛᱮᱭ ᱢᱚᱦᱰᱟᱭᱮᱱᱹᱹᱹ ᱢᱟᱭᱱᱚ ᱛᱮᱠᱚ ᱟᱹᱛᱩ ᱥᱟᱨᱡᱚᱢᱰᱤ ᱛᱮ᱾ ᱟᱹᱛᱩ ᱛᱤᱭᱟᱹᱜ ᱠᱟᱛᱮ ᱠᱩᱞᱷᱤ ᱨᱮ ᱮᱱᱮᱡ ᱠᱟᱱ ᱜᱤᱫᱽᱨᱟᱹ ᱠᱚᱭ ᱠᱩᱞᱤ ᱠᱮᱫ ᱠᱚᱣᱟ, ᱯᱷᱟᱞᱱᱟᱣᱟᱜ ᱚᱲᱟᱜ ᱫᱚ ᱚᱠᱟ ᱥᱮᱫ ᱨᱮ ᱢᱮᱱᱟᱜᱼᱟ? ᱠᱟᱛᱷᱟᱭ ᱠᱚ ᱞᱟᱹᱭ ᱟᱫᱮᱭᱟ ᱦᱟᱱᱮ ᱦᱟᱱᱛᱮᱹᱹᱹ᱾
ᱩᱱᱠᱩ ᱮᱱᱮᱡ ᱠᱟᱱ ᱜᱤᱫᱽᱨᱟᱹ ᱢᱩᱫᱽ ᱨᱮ ᱢᱟᱭᱱᱚ ᱦᱚᱸᱭ ᱛᱟᱦᱮᱸ ᱠᱟᱱᱟ᱾ ᱯᱨᱚᱫᱷᱟᱱ ᱫᱚ ᱩᱱᱤ ᱧᱮᱞ ᱛᱮ ᱵᱟᱭ ᱵᱟᱫᱟᱭ ᱞᱮᱫᱟ ᱡᱮ ᱱᱩᱭ ᱠᱟᱱ ᱜᱮᱭᱟᱭ ᱵᱷᱟᱹᱜᱽᱱᱟᱹᱧ ᱜᱤᱫᱽᱨᱟᱹ ᱨᱮᱱ ᱵᱟᱹᱦᱩ ᱜᱤᱫᱽᱨᱟᱹ ᱫᱚ᱾ ᱵᱷᱟᱞᱟ, ᱫᱷᱩᱲᱤ ᱮᱱᱮᱡ ᱛᱮ ᱩᱨᱩᱝ ᱵᱩᱥᱩᱝ ᱢᱟᱭᱱᱚ ᱵᱮᱡᱟᱭ ᱩᱱᱤ ᱜᱮ ᱵᱟᱹᱦᱩ ᱜᱤᱫᱽᱨᱟᱹ ᱠᱟᱱ ᱮ᱾ ᱮᱱᱮᱡᱼᱮᱱᱮᱡ ᱛᱮ ᱢᱟᱭᱱᱚ ᱫᱚ ᱟᱡᱟᱜ ᱯᱩᱛᱞᱤ ᱵᱟᱸᱫᱮ ᱫᱚᱭ ᱫᱚᱦᱚ ᱦᱟᱛᱟᱲ ᱟᱠᱟᱫ ᱛᱟᱦᱮᱸ ᱠᱟᱱᱟ᱾ ᱮᱱᱮᱡ ᱡᱚᱠᱷᱚᱱ ᱛᱤᱱ ᱨᱮ ᱯᱨᱚᱫᱷᱟᱱ ᱫᱚ ᱯᱷᱟᱞᱱᱟᱣᱟᱜ ᱚᱲᱟᱜ ᱮ ᱠᱩᱞᱤ ᱞᱮᱫ ᱠᱚ ᱩᱱ ᱡᱚᱠᱷᱚᱱ ᱦᱟᱠᱚᱼᱯᱷᱟᱨᱮ ᱢᱟᱭᱱᱚ ᱫᱚ ᱟᱡᱟᱜ ᱯᱩᱛᱞᱤ ᱵᱟᱸᱫᱮ ᱦᱟᱛᱞᱟᱜ ᱨᱮᱭ ᱦᱚᱵᱚᱨ ᱠᱮᱫᱟ ᱟᱨ ᱯᱨᱚᱫᱷᱟᱱ ᱴᱷᱮᱱ ᱦᱮᱡ ᱥᱩᱨ ᱠᱟᱛᱮᱭ ᱢᱮᱱ ᱠᱮᱫᱟ “ᱟᱢ ᱫᱚ ᱤᱧ ᱵᱟᱵᱟ ᱮᱢ ᱠᱷᱚᱡᱮ ᱠᱟᱱᱟ?” ᱯᱨᱚᱫᱷᱟᱱ ᱫᱚ ᱢᱟᱭᱱᱚᱣᱟᱜ ᱠᱟᱛᱷᱟᱭ ᱟᱸᱡᱚᱢ ᱞᱮᱫᱟ ᱪᱮ ᱵᱟᱝ, ᱚᱱᱟ ᱫᱚ ᱚᱦᱚ ᱢᱮᱱ ᱞᱮ᱾ ᱢᱮᱱᱠᱷᱟᱱ ᱵᱟᱭ ᱟᱸᱡᱚᱢ ᱞᱮᱫ ᱞᱮᱠᱟ ᱜᱮ ᱩᱥᱟᱹᱨᱟ ᱛᱮ ᱟᱹᱛᱩ ᱠᱩᱞᱦᱤ ᱥᱮᱫ ᱮ ᱵᱚᱞᱚᱭᱮᱱ᱾
ᱟᱨ ᱱᱚᱜᱼᱚᱭ ᱩᱱᱠᱩ ᱚᱲᱟᱜ ᱦᱚᱸ ᱛᱤᱭᱟᱹᱜ ᱮᱱᱟ᱾ ᱢᱟᱭᱱᱚ ᱨᱮᱱ ᱮᱸᱜᱟ ᱟᱯᱟ ᱫᱚ ᱟᱹᱰᱤ ᱠᱤᱱ ᱨᱟᱹᱥᱠᱟᱹ ᱮᱱᱟ᱾ ᱮᱱᱛᱮ ᱢᱟᱢᱚ ᱵᱟᱞᱟ ᱫᱚ ᱟᱹᱰᱤ ᱢᱚᱡᱽ ᱵᱟᱞᱟ ᱠᱚ ᱞᱮᱠᱷᱟᱜᱼᱟ᱾ ᱵᱟᱞᱟᱭᱟ ᱡᱚᱦᱟᱨ ᱵᱟᱲᱟ ᱠᱟᱛᱮ ᱵᱩᱜᱤᱼᱡᱩᱫᱟᱹ ᱠᱚ ᱠᱩᱞᱤᱭᱟᱱᱟ᱾ ᱠᱟᱛᱷᱟᱭ, ᱵᱟᱱᱟᱨ ᱥᱮᱫ ᱨᱮᱱ ᱟᱹᱰᱤ ᱱᱟᱯᱟᱭ ᱜᱮᱭᱟ ᱠᱚ᱾ ᱯᱨᱚᱫᱷᱟᱱ ᱫᱚ ᱵᱟᱞᱟᱭᱟ ᱵᱮᱣᱦᱟᱨ ᱧᱮᱞ ᱛᱮ ᱟᱹᱰᱤᱭ ᱠᱩᱥᱤᱭᱮᱱᱟ᱾ ᱱᱤᱭᱟᱹ ᱠᱚ ᱵᱮᱣᱦᱟᱨ ᱛᱟᱞᱟ ᱨᱮᱜᱮ ᱢᱟᱭᱱᱚ ᱫᱚ ᱢᱚᱡᱽ ᱛᱮᱠᱚ ᱩᱢ ᱥᱟᱯᱷᱟ ᱠᱮᱫᱮᱭᱟ ᱟᱨ ᱯᱷᱨᱚᱠ ᱠᱚ ᱦᱚᱨᱚᱜ ᱟᱫᱮᱭᱟ᱾ ᱯᱩᱛᱞᱤ ᱵᱟᱸᱫᱮ ᱫᱚ ᱩᱥᱟᱹᱨᱟ ᱠᱚ ᱦᱤᱲᱤᱧ ᱠᱮᱫᱟ᱾ ᱚᱱᱟ ᱯᱷᱨᱚᱠ ᱥᱩᱢᱩᱝ ᱦᱚᱨᱚᱜ ᱠᱟᱛᱮ ᱦᱚᱸ ᱯᱩᱛᱞᱤ ᱨᱮᱭᱟᱜ ᱡᱟᱹᱨᱩᱲ ᱫᱚ ᱵᱟᱝ ᱵᱩᱡᱷᱟᱹᱣᱜ ᱠᱟᱱ ᱛᱟᱦᱮᱸ ᱠᱟᱱᱟ᱾ ᱮᱱᱛᱮ, ᱚᱱᱟ ᱯᱷᱨᱚᱠ ᱫᱚ ᱮᱠᱟᱞ ᱡᱟᱸᱜᱟᱼᱜᱩᱸᱴᱷᱤ ᱦᱟᱹᱵᱤᱡ ᱛᱟᱦᱮᱸ ᱠᱟᱱᱟ᱾ ᱢᱚᱡᱽ ᱜᱮ ᱠᱚ ᱦᱚᱨᱟᱥᱤ ᱠᱮᱫᱮᱭᱟ ᱱᱟᱹᱠᱤᱡᱼᱪᱤᱠᱟᱹᱬ ᱠᱟᱛᱮ᱾ ᱮᱱᱛᱮ ᱛᱮᱦᱮᱧ ᱫᱚ ᱯᱟᱹᱦᱤᱞ ᱫᱚᱢ ᱢᱟᱢᱚ ᱦᱚᱧᱦᱟᱨ ᱛᱮᱫ ᱮ ᱧᱮᱞᱮᱭᱟ᱾ ᱯᱟᱹᱦᱤᱞᱼᱯᱚᱨᱛᱷᱚᱢ ᱥᱟᱯᱷᱟᱼᱥᱟᱹᱯᱷᱤ ᱧᱮᱞ ᱠᱟᱛᱮ ᱡᱮᱢᱚᱱ ᱮ ᱠᱩᱥᱤ ᱩᱛᱟᱹᱨᱚᱜ᱾ ᱢᱤᱫ ᱜᱷᱟᱹᱲᱤ ᱠᱷᱟᱱ ᱜᱮ ᱵᱟᱹᱦᱩ ᱜᱤᱫᱽᱨᱟᱹ ᱦᱚᱸ ᱠᱚ ᱥᱩᱨ ᱠᱮᱫᱮᱭᱟ᱾ ᱦᱮᱡ ᱥᱩᱨ ᱠᱟᱛᱮ ᱡᱮᱞᱮᱠᱟ ᱰᱚᱵᱚᱜ ᱠᱚ ᱪᱮᱫ ᱟᱫᱮ ᱛᱟᱦᱮᱸ ᱠᱟᱱᱟ, ᱚᱱᱠᱟ ᱜᱮ ᱢᱟᱭᱱᱚ ᱫᱚᱭ ᱰᱚᱵᱚᱜ ᱠᱮᱫᱟ᱾ ᱯᱨᱚᱫᱷᱟᱱ ᱫᱚ ᱡᱚᱦᱟᱨ ᱟᱛᱟᱝ ᱵᱟᱲᱟ ᱠᱟᱛᱮ ᱢᱚᱴᱨᱟ ᱠᱷᱚᱱ ᱞᱟᱹᱰᱩ ᱟᱨ ᱠᱷᱟᱹᱡᱟᱹᱲᱤ ᱮ ᱨᱟᱲᱟ ᱠᱮᱫᱟ ᱟᱨ ᱮ ᱪᱟᱞ ᱟᱫᱮᱭᱟ᱾ ᱢᱟᱭᱱᱚ ᱦᱚᱸ ᱟᱹᱰᱤ ᱠᱩᱥᱤ ᱛᱮᱭ ᱟᱛᱟᱝ ᱠᱮᱫᱟ ᱯᱷᱨᱚᱠ ᱨᱮ᱾ ᱯᱨᱚᱫᱷᱟᱱ ᱫᱚ ᱡᱟᱸᱜᱟ ᱠᱷᱚᱱ ᱵᱚᱦᱚᱜ ᱦᱟᱹᱵᱤᱡ ᱮ ᱵᱮᱸᱜᱮᱫ ᱨᱟᱠᱟᱵ ᱟᱫᱮᱭᱟ᱾ ᱩᱱᱤᱭᱟᱜ ᱢᱮᱫ ᱟᱦᱟ ᱧᱮᱞ ᱛᱚᱨᱟ ᱜᱮᱭ ᱫᱤᱥᱟᱹ ᱟᱹᱪᱩᱨ ᱠᱮᱫᱟ, ᱮᱱᱟᱝ ᱫᱷᱩᱲᱤ ᱮᱱᱮᱡ ᱛᱮ ᱩᱨᱩᱝᱼᱵᱩᱥᱩᱝ ᱜᱤᱫᱽᱨᱟᱹ ᱱᱤᱛ ᱫᱚ ᱛᱤᱱᱟᱹᱜ ᱥᱟᱯᱷᱟ ᱵᱟᱹᱦᱩ ᱮ ᱧᱮᱞᱚᱜ ᱠᱟᱱᱟ᱾ ᱢᱤᱫ ᱜᱷᱟᱹᱲᱤ ᱪᱮᱫ ᱠᱚ ᱪᱚᱭ ᱜᱩᱱᱟᱹᱱᱚᱜ ᱠᱟᱱ ᱛᱟᱦᱮᱸ ᱠᱟᱱ ᱨᱮᱜᱮ ᱚᱲᱟᱜ ᱥᱮᱫ ᱠᱚ ᱦᱚᱦᱚ ᱟᱫᱮᱨ ᱠᱮᱫᱮᱭᱟ᱾
ᱫᱚᱥᱟᱨ ᱦᱤᱞᱚᱜ ᱥᱮᱛᱟᱜ ᱨᱮ ᱯᱨᱚᱫᱷᱟᱱ ᱫᱚᱭ ᱨᱩᱣᱟᱹᱲ ᱮᱱᱟ᱾ ᱨᱩᱣᱟᱹᱲ ᱡᱚᱠᱷᱮᱱ ᱟᱡᱟᱜ ᱦᱩᱫᱤᱥ ᱜᱟᱰᱟ ᱨᱮ ᱪᱮᱫ ᱡᱚᱵᱽᱨᱟ ᱪᱚᱝ ᱟᱹᱛᱩᱜ ᱠᱟᱱ ᱞᱮᱠᱟᱭ ᱟᱹᱭᱠᱟᱹᱣ ᱠᱮᱫᱟ᱾
Comments
Post a Comment