ᱟᱵᱚ ᱨᱮᱱ ᱦᱟᱯᱲᱟᱢ ᱠᱚᱫᱚ ᱛᱤᱢᱤᱱᱟᱝ ᱯᱟᱨᱟᱵᱽ ᱯᱩᱱᱟᱹᱭ, ᱪᱷᱟᱛᱟ ᱯᱟᱛᱟ, ᱮᱱᱮᱡ ᱥᱮᱨᱮᱧ, ᱞᱮᱜᱽᱼᱵᱷᱮᱜᱽ, ᱵᱚᱸᱜᱟᱼᱵᱳᱨᱳ ᱠᱚᱫᱚ ᱪᱷᱟᱹᱛᱤᱠ ᱠᱚᱣᱟᱜ ᱧᱮᱞ ᱠᱟᱛᱮ ᱠᱚ ᱫᱷᱟᱱᱵᱟᱫᱽ ᱥᱤᱠᱟᱹᱨ ᱯᱤᱲ ᱨᱟᱡᱟᱜ ᱩᱢᱩᱞ ᱨᱮᱠᱚ ᱛᱟᱦᱮᱸ ᱠᱟᱱ ᱚᱠᱛᱚ ᱨᱮᱠᱚ ᱪᱮᱫ ᱟᱠᱚᱣᱟᱱ ᱛᱟᱦᱮᱸ ᱠᱟᱱᱟ᱾ ᱢᱮᱛᱟᱜ ᱢᱮ ᱵᱟᱦᱟ, ᱥᱚᱦᱨᱟᱭ ᱟᱨ ᱜᱚᱢᱦᱟ ᱯᱟᱨᱟᱵᱽ ᱵᱷᱮᱜᱮᱫ ᱯᱟᱛᱟ ᱯᱟᱨᱟᱵᱽ, ᱪᱷᱟᱹᱛᱩ ᱠᱩᱸᱰᱟᱹ ᱯᱟᱨᱟᱵᱽ, ᱨᱟᱡᱟ ᱥᱟᱠᱨᱟᱛ ᱟᱨ ᱯᱩᱥ ᱥᱟᱠᱨᱟᱛ ᱯᱟᱨᱟᱵᱽ ᱮᱢᱟᱱ᱾
ᱱᱚᱰᱮ ᱫᱚ ᱯᱩᱥ ᱥᱟᱠᱨᱟᱛ ᱨᱮ ᱩᱜᱽᱨᱟᱹ ᱥᱮᱸᱜᱮᱞ ᱨᱮᱭᱟᱜ ᱠᱷᱟᱴᱚ ᱢᱟᱪᱷᱟ ᱠᱟᱹᱦᱱᱤ ᱠᱟᱛᱷᱟᱧ ᱞᱟᱹᱭᱮᱫ ᱠᱟᱱᱟ᱾ ᱱᱤᱛᱚᱝᱟᱜ ᱞᱮᱠᱷᱟ ᱡᱚᱠᱷᱟ ᱛᱮ ᱯᱩᱥ ᱪᱟᱸᱫᱳ ᱫᱚ ᱥᱟᱱᱛᱟᱲ ᱦᱚᱲ ᱦᱚᱯᱚᱱ ᱠᱚᱣᱟᱜ ᱢᱩᱪᱟᱹᱫ ᱪᱟᱸᱫᱳ ᱠᱟᱱᱟ᱾ ᱚᱱᱟᱛᱮ ᱥᱮᱨᱢᱟ ᱯᱩᱨᱟᱹᱣ ᱢᱩᱪᱟᱹᱫ ᱪᱟᱸᱫᱳ ᱥᱮᱴᱮᱨᱮᱱ ᱠᱷᱟᱱ ᱠᱚ ᱢᱮᱱᱟ ᱢᱤᱫ ᱛᱤᱞᱢᱤᱧ ᱡᱤᱣᱤ ᱟᱹᱭᱥᱚ ᱛᱟᱵᱚᱱ ᱵᱟᱲᱦᱟᱣ ᱟᱠᱟᱱᱟ, ᱵᱟᱧᱪᱟᱣ ᱥᱟᱨᱮᱡ ᱦᱚᱲ ᱡᱚᱢ ᱢᱤᱫ, ᱧᱩ ᱢᱤᱫ ᱧᱩᱛᱩᱢ ᱛᱮᱵᱚᱱ ᱯᱟᱨᱟᱵᱚᱜᱼᱟ᱾ ᱱᱚᱶᱟ ᱯᱟᱨᱟᱵᱽ ᱨᱮᱭᱟᱜ ᱢᱟᱦᱟᱸ ᱥᱮ ᱢᱟᱹᱦᱤᱛ ᱫᱚ ᱵᱟᱹᱱᱩᱜᱼᱟ, ᱱᱚᱶᱟ ᱫᱚ ᱡᱟᱦᱟᱸ ᱛᱤᱥ ᱫᱤᱠᱩ ᱠᱚᱣᱟᱜ ᱞᱮᱠᱷᱟ ᱡᱚᱠᱷᱟ ᱛᱮ ᱯᱩᱥ ᱪᱟᱸᱫᱳ ᱢᱩᱪᱟᱹᱫᱚᱜᱼᱟ ᱮᱱᱮ ᱦᱤᱞᱚᱜ ᱜᱮ ᱟᱵᱚ ᱦᱚᱸ ᱵᱚᱱ ᱯᱟᱨᱟᱵᱚᱜ ᱠᱟᱱᱟ᱾ ᱱᱚᱶᱟ ᱯᱟᱨᱟᱵᱽ ᱫᱚ ᱫᱤᱠᱩ ᱯᱩᱥᱤ ᱥᱟᱱᱟᱢ ᱡᱟᱹᱛᱤ ᱨᱮᱱ ᱦᱚᱲ ᱠᱚ ᱢᱟᱱᱚᱛᱮᱫ ᱠᱟᱱᱟ, ᱡᱟᱦᱟᱸ ᱜᱮ ᱟᱱᱴᱟᱣᱚᱜ ᱠᱩᱲᱟᱹᱣᱚᱜ ᱜᱩᱲ, ᱛᱤᱞᱢᱤᱧ, ᱛᱟᱵᱮᱱ, ᱠᱷᱟᱹᱡᱟᱹᱲᱤ, ᱡᱤᱞ, ᱦᱟᱹᱠᱩ, ᱞᱮᱴᱚ, ᱡᱤᱞ ᱯᱤᱴᱷᱟᱹ, ᱜᱩᱲ ᱯᱤᱴᱷᱟᱹ, ᱛᱤᱞᱢᱤᱧ ᱯᱤᱴᱷᱟᱹ ᱟᱨᱦᱚᱸ ᱮᱢᱟᱱᱼᱮᱢᱟᱱ ᱠᱚ ᱠᱩᱲᱟᱹᱣ ᱠᱟᱛᱮ ᱠᱚ ᱡᱚᱢ ᱢᱤᱫᱟ᱾ ᱢᱟᱲᱟᱝ ᱦᱤᱞᱚᱜ ᱫᱚ ᱟᱫᱽᱣᱟ ᱪᱟᱣᱞᱮ ᱟᱹᱨᱩᱵ ᱟᱨ ᱛᱳᱭᱳ ᱨᱟᱜ ᱥᱮ ᱫᱤᱠᱩ ᱛᱮᱫᱚ ᱪᱟᱞ ᱫᱷᱩᱶᱟᱹ ᱠᱚ ᱢᱮᱛᱟᱜ ᱠᱟᱱᱟ, ᱫᱚᱥᱟᱨ ᱦᱤᱞᱚᱜ ᱫᱚ ᱵᱟᱺᱣᱰᱤ ᱦᱚᱞᱚᱝ ᱦᱩᱲᱩᱝ ᱥᱮ ᱫᱤᱠᱩ ᱛᱮᱫᱚ ᱜᱩᱬᱤ ᱠᱩᱴᱟ ᱟᱨ ᱟᱵᱚ ᱛᱮᱫᱚ ᱡᱤᱞ, ᱦᱟᱹᱠᱩ, ᱞᱮᱴᱚ ᱯᱤᱴᱷᱟᱹ, ᱡᱚᱢ ᱧᱩ ᱟᱨ ᱛᱮᱥᱟᱨ ᱦᱤᱞᱚᱜ ᱫᱚ ᱫᱤᱠᱩ ᱛᱮ ᱥᱟᱠᱨᱟᱛ ᱟᱵᱚ ᱫᱚ ᱜᱩᱲ ᱯᱤᱴᱷᱟᱹ ᱛᱤᱞᱢᱤᱧ ᱯᱤᱴᱷᱟᱹ, ᱠᱷᱟᱹᱡᱟᱹᱲᱤ ᱛᱟᱵᱮᱱ ᱡᱚᱢ ᱧᱩ ᱟᱨ ᱵᱮᱡᱷᱟ ᱛᱩᱧ᱾ ᱥᱟᱠᱨᱟᱛ ᱫᱚᱥᱟᱨ ᱯᱩᱱᱟᱜ ᱦᱤᱞᱚᱜ ᱫᱚ ᱟᱠᱷᱟᱱ ᱡᱟᱛᱨᱟ᱾
ᱚᱱᱠᱟ ᱜᱮ ᱵᱟᱺᱣᱰᱤ ᱦᱤᱞᱚᱜ ᱥᱤᱠᱟᱹᱨ ᱯᱤᱲ ᱨᱟᱡᱽ ᱨᱟᱹᱱᱤ ᱢᱚᱠᱚᱨ ᱢᱩᱱᱤ ᱚᱲᱟᱜ ᱨᱮᱭᱟᱜ ᱜᱮᱡ ᱜᱩᱨᱤᱡ, ᱞᱩᱸᱰᱟᱹ ᱯᱚᱛᱟᱣ ᱪᱟᱵᱟ ᱵᱟᱲᱟ ᱠᱟᱛᱮ ᱛᱟᱨᱟᱥᱤᱧ ᱵᱮᱲᱟ ᱵᱚᱸᱜᱟ ᱥᱟᱯᱟᱵ ᱰᱟᱹᱞᱤᱡ, ᱦᱟᱴᱟᱜ, ᱰᱷᱟᱹᱯᱱᱤ ᱟᱹᱨᱩᱵ ᱟᱹᱜᱩ ᱟᱨ ᱩᱢ ᱵᱟᱲᱟᱜ ᱦᱤᱡᱩᱜ ᱢᱮᱱᱛᱮ ᱱᱟᱹᱭ ᱜᱷᱟᱴ ᱛᱮᱭ ᱪᱟᱞᱟᱣ ᱞᱮᱱᱟ᱾ ᱟᱫᱚ ᱵᱚᱸᱜᱟ ᱥᱟᱯᱟᱵ ᱦᱟᱴᱟᱜ, ᱰᱟᱹᱞᱤᱡ, ᱰᱷᱟᱹᱯᱱᱤ ᱠᱚ ᱟᱹᱨᱩᱵ ᱵᱟᱲᱟ ᱠᱟᱛᱮ ᱩᱢᱩᱜ ᱠᱟᱱ ᱡᱚᱦᱚᱜ ᱚᱠᱟ ᱞᱮᱠᱟᱭᱮᱱ ᱪᱚᱝ ᱮ ᱟᱫᱚᱭ ᱩᱱᱩᱢ ᱰᱩᱵᱩᱡ ᱜᱚᱡ ᱩᱛᱟᱹᱨᱮᱱᱟ᱾ ᱟᱹᱰᱤ ᱜᱷᱟᱹᱲᱤᱠ ᱦᱩᱭᱮᱱ ᱨᱮᱦᱚᱸ ᱵᱟᱭ ᱨᱩᱣᱟᱹᱲ ᱞᱮᱱ ᱠᱷᱟᱱ ᱠᱚ ᱧᱮᱞ ᱟᱹᱜᱩᱭᱮᱫᱚ ᱵᱟᱝᱢᱟᱭ ᱩᱱᱩᱢ ᱰᱩᱵᱩᱡ ᱜᱚᱡ ᱩᱛᱟᱹᱨ ᱟᱠᱟᱱᱟ᱾ ᱠᱷᱟᱱ ᱟᱫᱚ ᱪᱮᱫ ᱵᱟᱝ ᱠᱚ ᱪᱤᱠᱟᱹᱭ ᱱᱩᱱᱟᱹᱜ ᱡᱤᱞ, ᱦᱟᱹᱠᱩ, ᱞᱮᱴᱚ, ᱯᱤᱴᱷᱟᱹ ᱦᱟᱺᱰᱤ ᱠᱚ ᱠᱩᱲᱟᱹᱣ ᱟᱠᱟᱫ ᱥᱟᱱᱟᱢ ᱱᱟᱨᱵᱟ ᱪᱟᱵᱟᱜᱼᱟ᱾ ᱠᱷᱟᱱ ᱨᱟᱡᱽ ᱮ ᱢᱮᱱ ᱠᱮᱫᱟ, ᱠᱩᱲᱟᱹᱣ ᱟᱠᱟᱫ ᱡᱚᱢ ᱧᱩ ᱵᱟᱵᱚᱱ ᱵᱟᱹᱨᱜᱤᱞ ᱦᱚᱪᱚᱣᱟᱜᱼᱟ᱾, ᱫᱮᱞᱟᱵᱚᱱ ᱛᱮᱦᱮᱧ ᱨᱮᱜᱮ ᱱᱩᱭᱟᱜ ᱢᱟᱹᱬᱤ ᱫᱚ ᱢᱮᱴᱟᱣ ᱠᱟᱛᱮ ᱪᱷᱩᱶᱟᱹ ᱪᱷᱩᱛ ᱠᱟᱹᱢᱤ ᱫᱚᱵᱚᱱ ᱪᱟᱵᱟ ᱠᱟᱜ ᱛᱟᱭᱟ᱾ ᱟᱵᱚ ᱵᱟᱺᱣᱰᱤ ᱦᱤᱞᱚᱜ ᱧᱤᱫᱟᱹ ᱜᱮ ᱩᱱᱤᱭᱟᱜ ᱫᱚᱦᱚᱱ ᱠᱟᱹᱢᱤ ᱥᱟᱶᱛᱮ ᱪᱷᱩᱸᱣᱟᱹ ᱪᱷᱩᱛ ᱠᱟᱹᱢᱤ ᱫᱚᱠᱚ ᱯᱩᱨᱟᱹᱣ ᱞᱮᱫᱟ, ᱩᱱᱩᱢ ᱰᱩᱵᱩᱡ ᱜᱷᱟᱴ ᱰᱷᱤᱯ ᱟᱲᱮ ᱨᱮᱜᱮ ᱥᱟᱨᱟ ᱠᱚ ᱵᱮᱱᱟᱣ ᱠᱮᱫᱟ, ᱚᱱᱟ ᱜᱮ ᱱᱤᱛᱚᱝ ᱡᱟᱦᱟᱸ ᱩᱜᱽᱨᱟᱹ ᱥᱮᱸᱜᱮᱞ ᱢᱮᱱᱛᱮ ᱵᱚᱱ ᱢᱮᱛᱟᱜ ᱠᱟᱱᱟ᱾ ᱚᱱᱟ ᱥᱟᱨᱟ ᱨᱮ ᱩᱱᱤ ᱨᱟᱡᱽ ᱨᱟᱹᱱᱤ ᱢᱚᱠᱚᱨ ᱢᱩᱱᱤᱭᱟᱜ ᱢᱟᱬᱟ ᱫᱚᱠᱚ ᱨᱟᱯᱟᱜ ᱫᱚᱦᱚᱱ ᱠᱮᱫ ᱛᱮ, ᱩᱢ ᱱᱟᱲᱠᱟ ᱵᱟᱲᱟᱜ ᱛᱮᱫᱚ ᱥᱤᱢ ᱠᱚ ᱨᱟᱜ ᱜᱚᱫ ᱠᱮᱫᱟ᱾ ᱟᱫᱚ ᱩᱢ ᱱᱟᱲᱠᱟ ᱵᱟᱲᱟ ᱠᱟᱛᱮ ᱚᱲᱟᱜ ᱠᱚ ᱨᱩᱣᱟᱹᱲᱮᱱᱟ, ᱚᱲᱟᱜ ᱨᱮ ᱩᱱᱤ ᱢᱚᱠᱚᱨ ᱢᱩᱱᱤ ᱨᱟᱹᱱᱤ ᱵᱤᱫᱟᱹᱭ ᱧᱩᱛᱩᱢ ᱛᱮ ᱢᱤᱫ ᱥᱤᱢ ᱪᱤᱭᱟᱹᱵ ᱠᱚ ᱛᱷᱟᱯᱟ ᱠᱮᱫᱮᱭᱟ᱾ ᱫᱩᱣᱟᱹᱨ ᱠᱮ ᱫᱩᱣᱟᱹᱨ ᱨᱮᱭᱟᱜ ᱮᱛᱚᱢ ᱠᱚᱸᱭᱮ ᱯᱟᱦᱴᱟ ᱨᱮ ᱛᱷᱟᱯᱟ ᱯᱚᱥᱟᱜ ᱵᱚᱦᱚᱜ ᱢᱟᱭᱟᱝ ᱠᱚ ᱡᱚᱨᱚᱣᱟᱫᱟ ᱟᱨ ᱠᱩᱞᱦᱤ ᱫᱩᱣᱟᱹᱨ ᱨᱮᱫᱚ ᱠᱚ ᱛᱷᱟᱯᱟ ᱢᱩᱪᱟᱹᱫ ᱠᱮᱫᱟ᱾ ᱚᱱᱟ ᱜᱮ ᱱᱮᱛᱟᱨ ᱦᱚᱸ ᱵᱚᱱ ᱜᱚᱡ ᱜᱩᱨ ᱞᱮᱱ ᱠᱷᱟᱱ ᱢᱚᱬᱟ ᱨᱟᱯᱟᱜ ᱥᱮ ᱛᱚᱯᱟ ᱫᱚᱥᱟᱨ ᱦᱤᱞᱚᱜ ᱫᱚ ᱩᱱᱤ ᱥᱚᱡ ᱮᱱ ᱵᱷᱤᱸᱫᱟᱹᱲᱮᱱ ᱵᱤᱫᱟᱹᱭ ᱧᱩᱛᱩᱢ ᱢᱤᱫ ᱥᱤᱢ ᱪᱤᱭᱟᱹᱵ ᱜᱚᱡ ᱥᱤᱢ ᱧᱩᱛᱩᱢ ᱵᱚᱱ ᱜᱤᱰᱤᱭᱮᱫ ᱠᱚᱣᱟ᱾
ᱥᱤᱠᱟᱹᱨ ᱯᱤᱲ ᱨᱟᱡᱽ ᱛᱤᱱᱟᱹᱜ ᱫᱤᱱ ᱫᱟᱲᱮ ᱟᱨ ᱡᱤᱣᱤᱫ ᱮ ᱛᱟᱦᱮᱸ ᱠᱟᱱᱟ, ᱩᱱᱟᱹᱜ ᱫᱤᱱ ᱩᱱᱤ ᱢᱚᱠᱚᱨ ᱢᱩᱱᱤ ᱨᱟᱹᱱᱤᱭᱟᱜ ᱩᱭᱦᱟᱹᱨ ᱧᱩᱛᱩᱢ ᱛᱮ ᱵᱟᱺᱣᱰᱤ ᱦᱤᱞᱚᱜ ᱚᱱᱟ ᱱᱟᱹᱭ ᱜᱷᱟᱴ ᱨᱮ ᱩᱜᱽᱨᱟᱹ ᱥᱟᱨᱟᱭ ᱵᱮᱱᱟᱣᱟ᱾ ᱨᱟᱡᱽ ᱨᱮᱱ ᱥᱟᱱᱟᱢ ᱜᱤᱫᱟᱹᱨ ᱯᱤᱫᱟᱹᱨ ᱥᱤᱢ ᱨᱟᱜ ᱛᱮ ᱤᱫᱤ ᱠᱟᱛᱮ ᱚᱱᱟ ᱟᱩᱜᱽᱨᱟᱹ ᱥᱮᱸᱜᱮᱞ ᱠᱚ ᱡᱩᱞ ᱛᱮᱠᱚ ᱩᱢ ᱱᱟᱲᱠᱟ ᱦᱤᱡᱩᱜᱼᱟ᱾ ᱨᱩᱣᱟᱹᱲ ᱠᱟᱛᱮ ᱨᱟᱡᱽ ᱡᱟᱸᱦᱟᱜᱮᱭ ᱠᱩᱲᱟᱹᱣ ᱟᱠᱟᱫ ᱡᱚᱢᱼᱧᱩ, ᱜᱩᱲ, ᱜᱚᱛᱚᱢ, ᱯᱤᱴᱷᱟᱹ, ᱠᱷᱟᱹᱡᱟᱹᱲᱤ, ᱛᱟᱵᱮᱱ ᱡᱚᱛᱚ ᱜᱤᱫᱟᱹᱨ ᱯᱤᱫᱟᱹᱨ ᱮ ᱮᱢᱟ ᱠᱚᱣᱟ᱾
ᱚᱱᱟᱛᱮ ᱟᱫᱚ ᱱᱮᱛᱟᱨ ᱦᱚᱸ ᱪᱷᱟᱹᱛᱤᱠ ᱡᱟᱹᱛᱤ ᱟᱨ ᱟᱵᱚ ᱦᱚᱲ ᱦᱚᱯᱚᱱ ᱨᱮᱱ ᱜᱤᱫᱟᱹᱨ ᱯᱤᱫᱟᱹᱨ ᱩᱱ ᱠᱷᱚᱱ ᱠᱚ ᱪᱮᱫ ᱟᱹᱜᱩᱣᱟᱠᱟᱫ ᱱᱟᱹᱭ ᱜᱷᱟᱴ ᱥᱮ ᱯᱩᱠᱷᱨᱤ ᱜᱷᱟᱴ ᱨᱮ ᱩᱜᱽᱨᱟᱹ ᱥᱟᱨᱟ ᱠᱚ ᱵᱮᱱᱟᱣᱟ᱾ ᱚᱱᱟ ᱩᱜᱽᱨᱟᱹ ᱥᱟᱨᱟ ᱨᱮ ᱥᱮᱸᱜᱮᱞ ᱠᱚ ᱞᱟᱜᱟᱣᱟ ᱟᱨ ᱚᱠᱚᱭ ᱛᱤᱱᱟᱹᱜ ᱫᱷᱟᱣ ᱠᱚ ᱩᱱᱩᱢ ᱰᱩᱵᱩᱡ ᱫᱟᱲᱮᱭᱟᱜᱼᱟ, ᱢᱮᱱᱟᱠᱚ ᱩᱱᱟᱹᱜ ᱜᱟᱸᱰᱟ ᱜᱮ ᱯᱤᱴᱷᱟᱹ ᱠᱚ ᱮᱢᱟ ᱠᱚᱣᱟ᱾ ᱩᱱᱩᱢ ᱰᱩᱵᱩᱡ ᱩᱢ ᱱᱟᱲᱠᱟ ᱵᱟᱲᱟ ᱠᱟᱛᱮ ᱚᱲᱟᱜ ᱠᱚ ᱨᱩᱣᱟᱹᱲᱮᱱ ᱠᱷᱟᱱ ᱢᱤᱫ ᱜᱚᱴᱟᱝ ᱥᱤᱢ ᱯᱤᱭᱟᱹᱵ ᱫᱩᱣᱟᱹᱨ ᱥᱮ ᱫᱩᱣᱟᱹᱨ ᱨᱮ ᱠᱚ ᱛᱷᱟᱯᱟᱭᱮᱭᱟ, ᱮᱱᱠᱟᱛᱮ ᱫᱚ ᱯᱤᱴᱷᱟᱹ ᱠᱷᱟᱹᱡᱟᱹᱲᱤ ᱠᱚ ᱟᱨ ᱦᱟᱺᱰᱤ ᱠᱚᱼᱠᱚ ᱡᱚᱢ ᱧᱩᱭᱟ᱾
Comments
Post a Comment